港股昨日先升後回，股民若然上午見個市升，以為調整夠就追入，咁就會吃眼前虧。內地股市同樣係調整未足，不過跌得仲勁，彈一彈就插，結果上證綜指插1.6%，港股只係跌0.4%。
中港股市腳仔軟軟，新華社日前緊急連發四篇文章，指中證監增加新股審批絕非打壓股市，再撐A股牛市格局仍將延續，文章刺激深滬股市高開。但市場又傳上調印花稅，國家稅務總局未有正面回應傳聞，僅稱不清楚此事，不似中證監此前明確否認上調印花稅的消息，投資者趁高位沽貨走人，大幅推低大市。上證指數昨收報4229點，跌69點；深成指收報14136點，跌96點。兩市成交再縮減至1.26萬億元人民幣。
A股如坐過山車，港股表現跟住反覆，先升後跌，隔夜美股杜指挫142點，拖累恒指低開57點，內地股市一度飆升，帶動港股高見28054點。A股尾段大幅倒跌，令港股升勢不保，恒指昨收報27640點，跌114點；國企指數收報13997點，跌80點，成交額1613.15億元。匯控(005)業績話就話好過市場預期，股價卻無力挽，收74.45元，跌0.4元。
調整未完 勿急買貨
陸羽仁覺得內地股市個幾月從3049點的低位彈升1500點上高位，急抽近五成，升得太急回吐壓力不少，好難跌一兩日就完，短期內還是反覆調整格局，想買貨唔使急得咁緊要搶住入。
雖然大市調整，但個別股份有炒作，部份更加喪升。半新股恩達(1480)上午已升兩成，收市前再急爆，公司董事會發通告好例牌咁話經合理查詢後，不知悉導致價格及成交量波動的任何原因。該股收報15.5元，飆5.85元或60%，成交額3025萬元。
恩達去年底上市，有中環茶友都抽咗少少，佢話隻嘢掛牌時好靜，但股價企喺招股價樓上都幾穩吓，跟住就拾級炒上，佢見升得多都半路落咗車。佢覺得隻嘢好明顯係貨源歸邊，你唔信佢又升，唔信佢又升。
講開無厘頭喪升股，有茶友又講到有班大戶專係玩夾倉，幾年前開始，外資興搞調查機構搞踢爆沽空，出報告唱衰等股價暴跌賺錢。?家有班夾倉大戶就刻意掉轉玩，擺明係炒供求，甚至一些不在沽空名單內的股份，都有人搵到貨去沽。但呢啲係大隻佬打交的遊戲，打得激烈，個別冷門股有時無厘頭大幅喪升，都係想夾死班淡友。
多隻中信系股份造好，中信大錳(1091)升幅最勁，最高曾見1.13元，收報1.03元，升27%。
中信系次次有炒作
中信資源(1205)亦升6%有進帳，過去幾次紅籌國企股大炒的熱潮，中信系都無試過缺席，但開邊瓣就次次有啲唔同。
中信系大家最熟悉當然係中信泰富，佢喺澳洲投資搞到頭都大，終於母公司決定整體上市，成為中信股份(267)。至於昨日爆升的中信大錳，主要業務為中國的錳礦開採、礦石加工及下游加工業務，同時在非洲開發錳礦開採。集團在二○一○年上市，過去幾年受內地工業生產放緩影響，一度出現虧損，股價一直潛水，最低去過5、6毫子，由於佢市值只有20、30億元，在中信系內屬於細細粒份子，今個星期已見成交增加，終於喺昨日爆上，升咗咁多都係31億市值，勝在細隻易炒。 股仔近排炒風盛，有隻叫博華(1076)嘅冷門股，突然話一送十五紅股，股價炒上一成。
睇番佢本來主要從事食品加工、製造及銷售業經營業務，主要包括冷凍食品產品及功能性食品產品，後來又收購了澳門博彩業務，睇落似變相賣殼。佢突然大送紅股，唔係業績有驚人突破，大賺特賺，而係似變相拆細。
喺呢個股份熱炒年代，呢類動作好易吸引股民注意，大家一齊起哄，好似咁樣拆到你眼花的股份，一心以為埋去博大霧的小股民，就要自己識得隨時執生啦。
沒有留言:
張貼留言