四月一日係愚人節，最大笑話係王征喺愚人節前夕聲稱賣亞視畀港視(1137)魔童王維基，港視股價昨晚在美國先升三成，到昨日早上才被人否認，隻股開市曾經飆升24.4%，最後大家都信收購係流嘢，但隻股仍升9.1%。
過去每逢傳港視有乜動作，我都叫大家唔好入去盲炒，你想佢攞到牌，同佢實際攞唔攞到牌係兩回事，唔好用自己期望去炒股，結果真係次次撲入去都衰。有中環茶友話，亞視呢件爛棉衲，執到唔使開心，港視執唔到，前路茫茫，又係頭痕，個市?家有得炒，隻股升咗啲，小股東係咪應該把握難得窗口，跳車搭過另一架啦？
港視無收購執身彩
中環茶友話，前晚睇到亞視新聞話王征決定將亞視賣畀港視，第一時間問真唔真，魔童有無銀搞㗎？?家港視叫做有廿零億，但淨係要嚟畀收購價、起廠、買儀器都唔知夠唔夠。大台無記(511)剛剛公佈業績，盈利都跌咗接近兩成，可知電視經營日益艱難，如果港視無政府同中央祝福，只係靠香港市場，係咪可以生存落去先？
所以如果港視買咗亞視，好有可能要向股東伸手，咁供唔供股有排煩嘞，?家證實佢唔係買家，至少手頭筆錢可以搣滅吓，不過，佢搞網視同網購，暫時仲係燒緊錢，同樣，如果佢無得北上大陸市場，只係靠香港，真係要祝佢好運。既然其他股票有得炒，係咪應該趁佢昨日差不多升近一成，換馬為上先？
外傳匯友資本(8088)大股東兼執行董事胡景邵擬接手亞視，匯友資本全日升12%，收報0.42元，但交易係要亞視獲得續牌做條件，由於行會決定收回亞視個牌，呢單嘢變成煲水新聞，咁呢12%都隨時要交番出來啦。
呢排滬港通南下資金較多，港股通昨日額度剩近88億元人民幣，用咗額度16%。由於大陸基金開始可以買港股，令市場對深港兩地股市互通興趣增加，至少會有人講吓，同之前提到無人提不同，好似尚乘資產管理主席證券及資產管理業務總經理連敬涵表示，深圳上市公司以中、小型股票為主，當中包括具吸引力的科技股。相信日後的深港通，會較滬港通受歡迎，又話如果政策若容許深港通可投資深圳創業板的股份，將有利刺激成交。
內地股民喜歡炒高風險股，深圳創業板未開通畀港人前，香港創業板已獲納入內地保險資金投資範圍，創業板指數勁升4.88%，多隻創業板股份狂升。醫療、科技係最大熱點，浙大蘭德(8106)股價曾爆升一倍，董事會表示知悉公司股價及成交量上升，經合理查詢後，確認不知悉導致價格及成交量波動的任何原因。
港股三甲盡創板
浙大德蘭外，同屬創板股的中持基業(8125)大升87.3%，造5.9元；神州數字(8255)急彈50%，造1.93元，三者成為港股升幅冠、亞、季軍，其他GG(8002)飆16%，；創新支付(8083)大升21%。創板股實力相差好遠，部份具備轉板條件，但好股未必炒得癲，炒得癲未必係好股，股民落場去炒，最好先做吓功課，同埋知道自己係投資抑或投機。
個市旺逐行炒，昨日炒到新能源，例如做電動車充電樁的泰坦(2188)，昨日勁升21%。
喺3月官方製造業採購經理指數(PMI)省鏡下，中港股市再舞高，上證指數續創七年新高，港股第二季首個交易日亦重回兩萬五大關，一度升近兩百點，挨近全日高位收市，大市連續三日成交破千億元。恒指收造25082，升181點；國企指數繼續跑贏大市，收報12537，升191點，成交金額逾1103億元。
個別板塊最搶眼係基建股，回吐過後紛紛重拾升勢。計劃分拆中交疏浚上市的中交建(1800)，連同中鐵(390)、中國鐵建(1186)全部都升超過8%。中字股場面熱鬧，係炒埋今日就放長假下，可以話係相當難得！
沒有留言:
張貼留言