中央搭咗個靚局
港股呢隻跑得慢的肥豬，突然之間快跑起來，如果用技術性啲嘅原因去解釋，就係三月結又到，基金為咗整靚盤數，於是搞點化妝，但呢個理由唔係咁特別，更有說服力應該係學陸羽仁講，中央搭個靚局出來，已經開始搞起了氣氛，大家炒緊「一帶一路」同「亞投行」的概念。
睇番今日爆上的，唔淨係得港股，內地股市都升得好唔錯，上證綜指飆升近100點，升勢直逼3800點，續創七年新高，但內地股市升2.6%，香港國企指數升3.4%，香港終於做番次叻叻豬啦。
先睇內地個市，阿爺上周六公佈「一帶一路」的《願景與行動》，昨日相關概念股在內地一開市即炒高，上證綜指開市已升穿3700點，其後持續穩步上揚。午後人民銀行話稍後召開新聞發佈會，市場揣測將公佈降低二套房貸首付比例政策。地產股向上平均急升3.6%，與金融股合力推動A股擴大升幅，上證指數收報3786點，漲95點；深成指收報13193點，漲318點。兩市成交金額1.22萬億元。
香港紅色股都唔執輸，買盤湧入為港股注入動力，恒指午後升幅一度擴大至463點，收造24855點，都升咗368點；國企指數收報12306，升408點，成交由上周五的779億元，大增至逾1408億元。騰訊(700)與港交所(388)為升市火車頭，兩股合力貢獻恒指94點升幅；港股成交大增，帶旺港交所全日急升14.2元，造193元，是升幅最大藍籌。
H股炒港股通資金南下
「滬港通」南向資金增加，德銀料呼籲留意折讓大H股，多隻AH折讓股狂飆逾一成。另外，市場憧憬「一帶一路」可帶來巨大商機，基建股午後進一步發力。中交建(1800)午後仲停埋牌，公司待發內幕消息公告，停牌前勁升1.45元，造11.42元。
中港兩地股市急升，散戶當然有啲頭腦發熱，中環茶友有唔少人入咗貨，話題離唔開究竟應該追貨、坐貨抑或沽貨。陸羽仁認為，個市升開有條路，如果係炒開嘅快槍手，晨早買、收市沽，跟紅頂白玩吓唔拘。若果從中線睇，個市係唔會只升不停，若然手上滿倉貨，睇位食吓胡亦唔拘噃，唔好望沽到頂位，落咗袋先至係真銀。
茶友中有位包拗頸，聽見就話︰陸Sir，你話短線客玩吓唔拘，中線客就要考慮睇位減少少貨，即係買沽你都講晒，有無少少矛盾呢？
我聽完氣定神閒，好認真咁答佢，一啲都唔矛盾，我從來都講投資要分清「投機的我」同「投資的我」，要分清長、中、短線，如果你係今日買、明日沽，個市依家咁升，升完第一浸，可能仲會炒吓落後，叫你唔好追，容乜易阻住你發達，升多一兩日你都鬧我？但如果你係揸中線，一年都係睇10%回報都好OK，咁昨日好多個股單日已經升咗幾個巴仙，隨時已賺咗一兩成，就可以分段食吓胡，因為你唔係一次買晒、一次沽晒，沽咗第一注，仲有第二注。當個市升你唔食胡，隔一兩個月佢打回原形，咁你咪得個睇字？仲衰少少就高位追貨揸中線，更易吃眼前虧。老散買股要先知自己做緊乜，係睇一兩日還是一兩個月，搞唔清想贏錢都幾難呀。
沒有留言:
張貼留言