內房弱股先回吐
恒生指數全日只升45點，兩萬五得而復失，恒指收報24900點，升45點。在大成交下回吐，睇嚟個市短期阻力都幾大。
浪升浪跌最明顯係內房股。中央降二套房首期救樓市，股民開市就湧入，醒目大戶趁好消息出貨，變成大戶鬥老散，多隻內房股先升後挫。中國海外(688)全日挫3.65%，造25.05元，跑輸一眾藍籌，如果睇番佢早段曾經爆上，早段低位有8%差距。學股神巴菲特比喻，喺咁大浪大沖之下，好多人已經沖甩咗條褲。
類似狀況同樣喺其他內房股出現，萬科(2202)去年多賺4.2%至157.5億元人民幣，股價收跌0.26元或1.39%，造18.4元，佢同樣又係先飆後軟，我覺得沽貨者有唔少係外資，佢哋對內地樓市仲係好有戒心，所以見佢急升，仲唔係沽貨的良機咩？其他好似公佈業績不俗的恒大(3333)都跌0.51%，保利置業(119)跌近4%。
港股首季埋單，恒指累飆1295點，國企指數則升362點，升幅追唔上大市，主要係外資唔睇好內地，沽售H股，如果唔係臨月尾H股借住港股通放寬消息衝一衝，H股仲落後得緊要。嚟緊呢季H股係咪可以好番，其中一樣係外資會唔會因為A股表現睇番好內地，調番資金去買。
個股中，騰訊(700)為藍籌首季升幅王，累飆31%；旺旺(151)是包尾藍籌，累跌20%；國指首季升幅最大為比亞迪(1211)，合共抽升31%；包尾國指成份股為神華(1088)，首季共挫16%。
廣發好命「掂過碌蔗」
做人最緊要條命生得正，首季新股都係一樣。內地第四大證券商廣發證券(1776)截止公開招股，市場消息指共有約9.6萬人認購，公開發售已錄得逾180倍超額認購，凍資至少2500億元，成為今年新股「凍資王」。論規模，廣發本來只係「梗頸四」，但撞正證券商股受追捧，加上H股追落後，佢上市就「掂過碌蔗」，傳內地投行中金公司都想急急來港上市，仲話集資額加碼至200億元。
據外電報道，廣發證券的國際配售昨日提前截止，該公司擬以招股價上限定價，集資279億元。就算上限價18.85元計算，廣發證券H股較A股昨日收市價的折讓幅度仍然有5%。睇番舊年凍資王，中廣核電力(1816)公開部份超購逾100倍，啟動回撥機制，公開發售佔全球發售比例由5%提升至20%，就算多達13萬人搶購，最後都做到一人一手，由於掛牌表現不俗，捧場客回報唔錯。不過，中廣核乃係壟斷性質的國企，同證券商股唔同，廣發有無一人一手，考慮有啲唔同啦。
沒有留言:
張貼留言