內地期指今日結算，決戰日前阿爺紮定馬步迎戰，中央硬功護航，相信造淡者都難攖其鋒，要留意是敏感日子過後，阿爺照理都要唞唞，個市可能會自由飛行一段時間。由於觀望氣氛濃厚，港股全日交投不足1000億元。
維穩過關可能唞唞
內地期指結算前，維穩部隊先行出招，包括昨日早上恒生電子的HOMS系統停收新客戶。呢間公司喺跌市期間，被指係唔少場外配資指定的交易系統，是斬倉沽盤的源頭，於是成為公安部門調查重點。阿里巴巴老闆馬雲私人係呢間公司嘅股東，於是惹來外界言語，佢自己為此大歎無辜，形容係「躺着都中槍」。馬雲否認同跌市有關，仲話自己無炒股好耐。
在跌市之前，阿里成為股壇金手指，同佢沾上關係都炒作一番，連佢身邊人都好似有咗神奇力量，呢種情況往後唔知有無改變。昨日，馬雲持有的雲峰金融及關連人士入主的瑞東集團(376) 股價及相關新聞 仍然炒得吓，收市報15.38元，升近一成。瑞東易主後最高炒上25元，依家跌幅同好多三、四線股差唔多，不過佢依家市值仍有成700億元，市場過去咁抬捧，完全係憧憬大股東有好料益公司，譬如話注入金融或支付業務，所以買佢同買個夢差唔多啦。大家要記住，升市時要炒夢想，但萬一市場回到比較現實的市況時，夢想有機會，同時也危險，自己要計數。
對於呢類概念股，市場熱情無疑係淡泊咗少少，好似另一壇大動作是騰訊(700) 股價及相關新聞 夥「中國梅鐸」黎瑞剛及「殼王」陳國強，入股正在停牌的內地品牌運動服飾企業美克(953) 股價及相關新聞 ，有騰訊入場玩，在一個月前必定炒到反轉，而且有無同樣效應，仲要復牌先知。有人認為，A股難炒，反而有利香港炒股，但如果北水郁唔動，呢類上百億市值的概念股，調整起嚟幅度都可以好大，普通散戶跟炒無所謂，限注玩吓可以，若要瞓身，就要諗清諗楚先。
概念股唔敢大力炒，港股跟住內地股市上落。A股早段下滑，港股最多跌214點，之後內地股市倒升，港股全日升過百點，恒生指數收造25162點，升107點；國企指數收報11749點，升67點，成交縮減至916億元。內地上證收升0.5%，收3823點。
今日內地期指結算，唔排除A股會再夾一夾，結算之後，護市行動再過一關，不過，個市唔可能長期由阿爺夾住佢行，過完關可能中央會放一放手，睇睇市場反應點，所以如果個市彈得高，就唔好太興奮，甚至可以考慮短線食吓胡。
個股方面，上海棟華(1103) 股價及相關新聞 進軍農業金融業務，股價大升25%。集團計劃透過附屬深圳市大生金融控股，提供農業領域內的融資租賃、貿易融資及其他農業供應鏈金融相關業務。
上落市短炒績優股
我早前叫大家留意的東方航空(670) 股價及相關新聞 發盈喜，料中期純利大升249至263倍，加上隔夜紐約期油下挫逾3%，東航股價應聲造好，全日收報6.4元，急升逾9%；南方航空(1055) 股價及相關新聞 同樣造好，收報8.29元，升3.8%；國泰航空(293) 股價及相關新聞 升1.5%，報19.18元。
伊朗同美國核談判上取得進展，未來石油供應可能增加，油價短期維持易疲軟局面，石油生產股相信仲有段時間會捱打。航空股受惠於油價，成本顯著拉低，而且航空股升了一浸，有可能回吐。斷估港股未來好有機會進入上落市，留意盈利有保障公司炒炒短線，是呢種市況下搵食方法之一。
如果計數，國泰市盈率23倍，去年因為係高價做了期油對沖影響盈利，今年增長應會反映平油因素，整體而言，佢同其他航空股唔可以話超平，但仍有一定吸引力，最好係趁回落先買。論質素，國泰盈利表現較為穩定，如果論估值抵買，東、南航比國泰航空應該勝一籌。
後記：陸羽仁新書《順勢•逆勢》出版，我將在本周六上午十點半至十二點半及本周日下午兩點半至五點半在書展現身簽名，地點是泛華發行的書展攤位1B-A16(綜合書刊館)，歡迎大家到場相聚。
沒有留言:
張貼留言