一輪「晒冷」後，歐洲理事會主席圖斯克(Donald Tusk)喺香港時間昨日下午公佈，歐羅區峰會一致同意救助希臘方案。圖斯克亦證實，希臘債務談判達成一致協議；歐洲穩定機制(ESM)已準備好向希臘提供救助。德國總理默克爾透露，希臘與歐洲夥伴仍然面對艱難道路，以確定新一輪救助細節。消息甫出，歐羅匯價隨即走高，曾觸及1.1196美元。
希臘總理齊普拉斯玩公投向緊縮政策說不，一眾債主不是省油的燈，喺投票前先停援助，搞到希臘人無錢用，商戶一頸血。不過講到底，歐羅強國好似德國心裏面都諗，有個窮親戚推低匯價，對自己出口有好處，但唔想搞出人命，小懲大戒後終於同意繼續援助希臘。喺消息刺激下，港股下晝升幅擴大，上破咗兩萬五千點關口。
嚴查配資 無阻升勢
希債危機對港股，始終係隔一重的消息，最直接同令人關注，都係內地股市。公安同監管機構嚴查沽空同場外活動不手軟。內地財經網站披露，一間在杭州的主要證券交易系統公司，昨日突然接到證監局通知，要求公司高管八點半在公司待命開會。公司多位高管被安排在不同會議室進行「約談」，負責配資公司常用的交易系統的高層，是這次重點約談對象。阿爺重點調查配資活動是否跌市根源的動機，相當明顯。
內地用銀彈加公安救市，本地市場觀望氣氛仍然濃厚，內地氣氛就強好多。A股雖然高開逾1%後曾一度倒跌，但10點過後上證指數開始節節上升，午後一度升逾4%，重返4000大關，但金融股板塊及兩桶油表現偏軟，拖累大市尾段升幅略為收窄，上證指數收報3970點，升92點，仍升2.4%；深成指數收報12614點，升576點；創業板指數收報2683點，升147點，大升5.8%。
內地股市拗腰抽升，推動港股收復失地，配合午後與希臘達成提供新救助協議消息推動，恒指收造25224點，升322點，升1.3%；國企指數收報12003點，升145點，升1.2%，成交1368億元。昨日科網股表現省鏡。騰訊(700)升1.1%，報150.5元；金山軟件(3888)揚6.5%，收22.95元，網龍(777)彈7.6%，報24.9元。
內地股市連續大彈三日，昨日有350家以上公司帶住利好消息復牌，無阻大市升勢，估計未來即使內地也會進入升幅溫和的復原期，唔好期望日日都大升。港股表現明顯落後於內地，見到內地上證升2.4%，香港國指升1.2%，得人地升幅一半就知。未來港股慢慢變個別發展，但若氣氛恢復，部份炒股都會好番啲。
新股大彈 收復失地
大市回穩下，喺跌市中掛牌的半新股紛紛抽上，個別開始接近招股價，曾經成為輸錢王的環球醫療(2666)大升16%，收市報8.08元，距上市價8.18元好近。佢本身係中國最大型的綜合醫療服務供應商，招股上限價10元。環醫出世遇饑荒，雖然調低咗招股價，捧場客依然難忘重創，首日曾經插到去4.68元，成為蝕錢王，不過?家已比低位大彈73%！呢個世界真係一時地獄，一時天堂。隻嘢既然有機會浮番上水面，若之前認咗新股扮蟹，有閒錢就不妨坐多陣，好過亂咁換馬。
另一隻營運農本坊的培力控股(1498)，掛牌都插近四成，呢兩日都回番上去，低招股價6%，慢慢接近水面。
沒有留言:
張貼留言