上周港股無端端炒深港通有料到爆上三百幾點，結果周六日靜如深海，粒聲都無，加上外圍市況唔好，美股喺加息陰影下低收百幾點，恒指唔止原銀奉還，跌清上周五升幅，仲要加料奉還。不過，從呢排交投減少顯示，資金不足易跌難升，股民已經有咗戒心，唔會隨便高追，大家喺呢輪都識打因住波。
深港通無料到唔使失望
呢排個市係敏感日子，今周美國聯儲局有嘢講，加上政改方案上立法會，大家事前都預咗係凶多過吉，都唔敢大手追貨。上周借深港通炒上，唔多唔少係因為個市跌咗咁多，搵個理由反彈吓，但彈完之後未有消息，咪又跌番落嚟囉。陸羽仁認為，就算深港通真係有公佈，喺大環境未得之下，都唔排除變咗好消息俾大戶出貨的機會，呢啲叫做天要下雨、娘要嫁人，由她去吧。
深港通突然傳話開通，雖然有少少無厘頭借意之感，但中央喺度搞緊，希望早日推出，應該係不爭事實。有知情人士講，依家兩地互通已有大致藍圖，深港通特色之一，係會有不同層次的股份互通，包括創業板在內。當中港兩地作出宣佈後，估計快則一個月，慢則三個月內就可以啟動。聽佢咁講，加上有了滬港通的經驗，相信深港通唔使等好耐就可以推出。不過，呢類消息對個市嘅影響，好多時仲要市況配合，如果個市唔想郁，就算開通都無用，但當個市想炒上，咁借住呢啲消息，咁就會大幅爆上。
深港通開通傳聞幻滅，同時人民銀行周末又未有下調存款準備金率，恒生指數一早低開，隨後內地股市倒跌，累港股失守兩萬七大關，尾市跌幅擴大至439點，最終全日挨近低位26841點收市。恒生指數收造26861點，挫418點；國企指數收報13622點，瀉361點，成交縮減至1165億元，幅度都幾「金」。
深港通「食詐胡」，上周五急升的證券股回吐急，西證國際(812)、耀才(1428)都瀉6%，英皇證券(717)降5%。「深港通」AH折讓概念股亦回落，東北電氣(042)跌4%，新華製藥(719)挫5.6%，造7.39元，至於港交所(388)都跌咗9元或3%。從成交睇拋售唔算好勁，只係買貨人少，搞到指數跌晒，佢再繼續跌，錢多貨少者就可以加考慮加少少磅。
炒股仔食胡實無錯
早兩個月的瘋狂市況不再，公司搞作好多都出波折。傾咗一排話考慮賣盤的鱷魚恤(122)表示，接獲售股股東告知，售股股東終止與潛在買方就可能交易的磋商。受消息拖累，股價應聲急插，最低造1.11元，大瀉近四成，收市報1.36元，都跌咗26%，佢幾年前大股東曾考慮私有化，結果被否決，股價升完大插。今次大股東話考慮賣盤，股價扯高幾倍插番低，所以話買賣呢類股仔，有胡唔食晒都要食多少，就算賣唔到最無所謂，總之賺錢食胡幾時都唔會錯。
另一隻優派能源(307)公佈，公司發行可換股票據配售協議失效。該公司原先計劃發行本金額最多不逾2.4億元可轉換證券，為期三年及年息5厘，每股兌換價為0.55元，涉最多4.36億股兌換股份，所得款項淨額分別約1.58億元及2.35億元。
異類股呢排好多都唔妥，高銀系繼續瀉，高銀地產(283)未止血，跌穿5月21日低位9.52元，收造9.25元，大跌近一成，同系高銀金融(530)則降2%，造12.2元，呢類瘋狂累升股份過去如果無賺過錢，?家就無謂走去博啦！
沒有留言:
張貼留言