陸羽仁 金融High Tea 強資幣效應 2015年03月13日

　　港股七連跌後，股民俾人插咗一輪，開始知道乜嘢原因，講出嚟不外乎係內地經濟差，同美國有可能上調息口，美元轉強不利同美元掛鈎嘅股市。投資市場裏面，大鱷通常都係趁你唔防備之時插你兩刀，當你睇到小心咗，佢又會收一收手，所以美股插完一日後上落不大，港股連跌之後，都跟內地股市彈番一彈。

　　南韓又突然減息

　　港股積弱，可以話受幾個不利因素影響，美股腳軟外，仲有一個係強美元，因為港元同美元掛鈎，強美元等如強港元，對企業係有壓力，尤其好似南韓又突然減息，搞到韓圜見近兩年低位。人仔同美元基本上半掛鈎，人民幣相對其他貨幣，基本上都係強，所以內地經濟都受強美元壓力。

　　我在網誌已經講，強美元的觸發原因是聯儲局可能加快加息。《華爾街日報》記者、有聯儲局線人之稱的Jon Hilsenrath日前就話，聯儲局將會本月18日的會議刪除加息前瞻指引中「耐性」(patient)這個措詞，預計聯儲局將於今年6月決定開始加息。

　　據統計，標普500指數過去二十七個交易日，其中有十九日受到美元向上影響而下跌。按照美銀美林外匯策略部主管Athanasios Vamvakidis表示，這意味着市場開始將強美元當成影響美國經濟的不利消息，美元上升步伐加速，成為打擊美股的風險。以匯價因素而論，未來中國同香港經濟，以至股市都會受到貨幣呈強勢因素的影響。

　　不過，昨日內地上證指數急升1.8%，加上擔心聯儲局提早加息和強美元的疑慮已經影響咗咁多日，恒生指數連跌過千點後，終於出現反彈，買盤未敢進一步入市，最終港股升勢放緩，受制23800點收市。恒生指數收報23797點，升79點。大市動力暫時仲係唔係咁充足，彈完之後在下周三聯儲局會議之前，有可能仲要再試試底。不過如果你水多貨少，就可以在大市反覆跌時，補充番少少貨源，因為我估個市又唔至於一下咁插落去。

　　俊文急插夠驚嚇

　　前日急跌拖累大市的中移動(941)，於大行瑞銀將評級由「沽售」升至「中性」，目標價由75元大升至110元，股價一度返回「紅底股」之列，全日升1.85元，收99.75元。中移動咁大升究竟係大行威力真係咁勁，抑或係大戶借佢托一托個市呢？陸羽仁就認為後者的機會不能排除。

　　個股方面，俊文寶石(8351)斥6億元買入東方紅，同時建議股本重組後供股，集資3.94億元，全日收造0.057元，大跌近33%。近排市場興炒股仔，但股仔經常踩地雷，呢個就係玩過山車要預咗付出的車費。惠理(806)公佈截至去年底止全年業績，股東應佔盈利8.04億元，按年增長109%，每股基本盈利45.4仙，建議派末期息16仙，另派特別息每股6仙，在去年下半年的升市中，代人投資似乎仲好搵。