長和過一關 股價升一升
雖然新公佈匯豐中國2月PMI創五個月新高，令港股曾升過百點；但利好數據唔等如利好A股，內地股市羊年首個交易日低收，限制埋港股升幅，恒指掉頭下跌，一度跌59點。匯豐中國PMI數據公佈後，加上財政預算案未有對樓市加辣，午後升幅曾擴大至119點。不過，內地股市低收，港股升勢放緩，恒指收報24778點，升28點；國企指數收報12064點，升18點，成交金額714億元。
長實(001)舉行股東大會，重組方案最終以99.76%大比數通過。長實全日升0.7元，造152元；和黃升0.8元，造105.6元。
A股低收，內地證券股及A股ETF受壓，內地股市有咁反應，唔多唔少係等緊阿爺出招，阿爺未有動作，大家就放手任個市跌，到聞到味會有料到，個市可能先偷步炒上，炒呢種政策市，不能夠等消息見光先郁手，如果見佢跌到咁上下，可以考慮先買住一注，咁就算阿爺突然宣佈放水，都可以有胡食。
多間大行稱澳門農曆新年期間賭業數據差，濠賭股慘遭洗倉。幾隻龍頭股都跌超過半成，新濠(200)挫足6.1%，報15.88元。陸羽仁過年前一直叫大家見高沽濠賭股而唔係買，都算提醒咗大家。呢個局，估到啦。
昨日濠賭股可以話係運滯，有大行唱衰，同時澳博(880)公佈，去年純利下跌12.7%，至67.31億元，每股盈利1.2元，建議派發末期息62仙，連同中期息，全年派息下降16%至84仙，顯示博彩公司盈利受壓。澳博市盈率低，加上無乜負債，仲可以頂住派番咁上下息，其他資本開支大的公司，情況應該仲差。呢排香港話限制自由行嘈到拆天，亦會累埋澳門，若然係咁本地零售股固然受傷害，澳門只係得博彩一瓣，濠賭股可能插得仲傷。
有澳門朋友話，通常當地博彩業最旺係年初四後，但呢幾日見到狀況唔係咁好。
羊年首隻新股香港寬頻(1310)，計劃於本周五(27日)開始招股，套現集資最多58億元，每手入場費4545.35元。該公司將以全舊股形式上市，大股東私募基金CVC的持股量，在上市後將由70%驟降至不足15%；作為基礎投資者的加拿大退休基金，反而成為最大股東。對於呢類賣舊股公司，好多人會有疑慮。
港視搞電視未有出路
簡單講，CVC上市旨在套現，跟住再去投資其他高增值業務，呢類私募基金好似發展商起樓，要貨如輪轉，唔會「責貨」收租，所以佢沽貨好正常，甚至可以話未必睇得好淡，只不過佢食咗最好食嗰一浸就走啦。至於散戶係唔係買得過，首要睇未來息口去向，其次睇定價，由於本地寬頻市場接近飽和，增長唔可能太快，似半隻收息股，股價愈平回報愈高，如果想買來收息，可能唔好認購，等佢掛牌或者會插吓，吼吼有無入平貨機會。
香港寬頻上市，陸羽仁比較有興趣反而係，根據招股價上限計算，香港寬頻市值約為90億元，較2012年港視(1137)主席王維基出售給CVC的作價48.7億元高85%。魔童搞幾年電視，銀紙燒唔少，收視唔太理想，仲係未有乜頭緒，若然無賣坐住檔舊生意似乎仲着數！
呢啲係搞新生意的風險，搞新生意成功就一本十利，甚至一本萬利，所以魔童賣股，唔可以話佢係對或者錯，不過作為小股東無得話事，最大着數係跟紅頂白，佢賣股收完息，大可乘機沽貨買其他股走番兩轉，見佢掂檔先游返埋去，但暫時睇港視都係唔好掂住。
沒有留言:
張貼留言