匯控業績唔會靚仔，已在市場預期之內，正因為呢個理由，喺公佈業績前股價借住被罰消息質低，形成好淡雙方一次肉搏，家回頭睇，似乎沽貨的是強手，包括對大笨象業績跟得好足的基金大戶，他們趁壞消息未曝光前沽貨，至於接貨者則係傳統投資者，覺得股價咁低有博反彈空間。不過，當業績宣佈出來錄得大倒退，大家嚇一嚇，傳統投資者都唔敢咁勇，且戰且退下，心理大關應聲而破。
匯控成績表唔係咁靚仔，基本上反映了歐洲經濟同各國政府對金融機構的不友善態度，呢個情況唔單止個別銀行係咁，整個大環境都唔係咁好，所以西方銀行家以前係打工皇帝，家就好多都捱緊日子。從大環境嚟睇，跨國銀行股已經唔再係理想的投資對象，渣打(2888)亦如是。
國企表現勝恒指
受匯控倫敦股價急跌影響，恒指一早低開，午後跌幅曾擴大至163點，尾市跌幅開始收窄。恒指收報24750點，跌86點；國企指數表現好啲，收報12046點，微升4點，成交580億元。匯控開市已跌穿70元大關，是表現最差藍籌股，收報69.45元，挫2.55元，一股已拖低恒指102點。旗下恒生銀行(011)去年純利按年減少43%，接近市場預期下限，股價都跌咗0.5元，報142.2元，恒生銀行早前借減持興業銀行股份消息炒上，雖然今次成績表不算突出，但勝在股價先升為敬，家就算軟番些小，對小股東都已經有交代。跨國銀行生意難做，渣打都挫4.5元，報111.1元。
羊年股市開咗兩日，都見到市場初步形勢，去年幾個弱勢板塊，暫時都未見起色，好似大型銀行股，另外濠賭股受到春節澳門旅客增長大幅放緩、豪客減少的影響，連續兩日捱沽，航空股、基建股就繼續炒有利的宏觀氣候，羊年初個市都係要跟大勢去炒。
長實重組料可通過
濠賭股喺過年前一度炒作反彈，升幅叫做似模似樣，陸羽仁當時建議係應該趁高沽貨，而唔係撈底博反彈，因為估計澳門賭收增長放緩暫時仲未有改善條件。
何況，就算旅客數字穩定下來，隨時當地娛樂設施大舉擴建，新場逐步落成，競爭必然加劇，在營運支出增加下，經營收入好難同步增長，咁即係話本來利潤唔錯嘅生意，會慢慢步入無咁好賺的時代，呢個因素不在遊客數字上反映，而係會係房間入住率上顯示出來，但究竟市場對呢個變化，又消化咗幾多呢？所以，在新春旺季結束後，呢個板塊好可能又會回復原先弱勢情況。
明日，市場焦點可能會轉移到即將進行重組的長實(001)及和黃(013)上，集團於本周四(26日)公佈全年業績。市場預期長實去年核心純利介乎304億元至394億元，由按年跌9%，至升18%。有證券商預料去年長實的本港發展業務盈利大升近九成，但同時內地物業收益減少將影響集團業績。至於和黃去年純利介乎401億元至514億元，按年升29%至65.1%。但同時憂慮油價下跌，會拖低和黃核心純利。
不過，在公佈業績之餘，市場好關心長實今日將舉行股東會表決重組方案，由於大股東李氏家族參與投票下，相信重組表決可順利通過。在表決前，市場傳有對沖基金密謀在餘下表決中阻礙重組，一般估計成功機會甚微。
長和自從宣佈重組後，股價升咗唔少，長實股價企喺歴史新高，有證券商繼續唱好合併後股價表現，假如重組無效，一切就回歸基本步，股價可能打回原形，這是管理層握在手上的最大籌碼。至於對沖基金都係市場大鱷，當然不是省油的燈，想趁住集團有大動作搵食唔出奇，由於整個改組程序要花一段時間，市場自然留意會唔會有「超人決戰大鱷」的戲碼嘞。
沒有留言:
張貼留言