內地A股復盤前夕，港股大玩反彈之旅，幾個板塊嘅超跌股份，都大幅夾高，三桶油借於國際油價回升抽上，就係明顯例子，其他好多股仔都爆炒殺上。
市場憧憬內地A股長假後復市追落後，加上相信美國聯儲局今年難啟動加息，港股調整一日後，開市不久就見有買盤突然湧入，推動港股掉頭回升，一直掃高，港股尾市最多飆696點，全日挨近高位22527點收市。恒生指數收報22515點，大升684點；國企指數收報10394點，升463點，成交番上1087億元。
到內地升隨時CHOK
油組有計劃減產，隔夜倫敦布蘭特期油飆5.4%報51.92美元，為一個月來首次返50美元關上，「三桶油」借勢造好。中海油(883)勁揚14%，造9.52元，為表現最叻藍籌股，咁大隻股升咁勁，真係誇張。
預炒A股復市下，內地證券股午後落鑊，海通證券(6837)大升12%，報13.46元；中信證券(6030) 股價及相關新聞 也炒高11%。不過，證券股喺救市捱咗好多義氣，元氣都幾傷下，業績唔慌好，升得急有小小驚佢地長線會頂唔順喎。
港股咁升偷步味濃，升得咁急，有小小預支咗升幅嘅可能，如果內地真係開市攀升，又會唔會輪到香港CHOK一CHOK呢？睇番個圖上個月曾經穿底，依家升番上去，仲上穿早前頂位22300點左右，走勢開始好番啲，唔排除呢一彈仲有幾百點升吓，去番到22800點樓上，咁呢個向上走勢已勝利完成，但跟住就可能又要回吐打吓底啦。
港股第三季跌到趴係地，第四季開始就彈番一輪。花旗銀行投資策略及研究部主管張敏華話，根據過往數字，美國加息前後三個月股市波動都較大，不排除美國要到明年春季或3月時才加息，料明年全年加息幅度1厘。我自己就無花旗睇美息可以加咁多。
深國炒前海大計
花旗張敏華又認為，未來投資者要留意新興市場經濟數據會否轉差，美國本月公佈9月企業盈利表現，佢對第四季表現並不悲觀，預料國企指數目標水平在12500點。而平保(2318) 股價及相關新聞 獲花旗欽點，成為全球二十隻最睇好的股票之一。平保昨日係升市下收造43.2元，揚3.9%。
市場炒五中全會內地提振經濟，樓市有可能係一個方向，市場依家看好係大城市房產，認為有買貴無買錯。有中環茶友早前去過前海，發覺當地發展速度仲係好慢，反而周邊地區就起晒樓。早兩日佢見到隻深圳國際(152) 股價及相關新聞 宣佈前海塊地改用途，就問投資價值點睇呢？
睇番深圳國際前海土地改變用途的公佈，話集團旗下全資附屬公司深圳西部物流與深圳市當局簽訂土地整備框架協議，其中一幅近四萬平米地塊的用途已由物流倉儲用地，改為綜合用地。市場預期土地價值預期大幅提升。
消息公佈後，深國股價冉冉上升，雖然速度唔係好急，但睇番佢今年高位14元，現價只係略為回調一成幾，明顯比起其他中資股強，看來係有人收集緊。
深國改變前海土地用途，看來係公司重點策略之一。公司上半年業績唔錯，管理層透露主要受惠深圳航空轉虧為盈，同時證實擬今年下半年或明年上半年出售其持有的51%梅林關城項目予發展商，深圳市政府亦可能向公司回購部份收費公路權益，看來集團有意「騰籠換鳥」，出售非核心資產，集中前海同深圳等核心地區同業務發展。
深國現價市盈率9倍，派息3.8厘，當中有部份唔係經常性盈利，未來會依靠售產維持派息，由於股價回調唔係咁多，茶友若對前海有信心，可以等候調整收集。
沒有留言:
張貼留言