內地股市狂態畢現，昨日上證綜指一度跌落近3600點，插咗2.4%，但最後收復晒失地，拗腰升番0.1%，勉強叫做十連升，但由於累積升幅較大，出現回吐唔奇。大陸股市升得太急，本應要調整，但內地股民就仲係心雄想再谷上，變成chok上chok落，跟車太貼確係有小小危險。
兩會之後，中央力保經濟，尋找新火車頭，其中創意之舉，就係大力推動亞洲基礎設施投資銀行(亞投行)，成功焗得英、法、德等歐洲大國加入，最新講法係阿爺想搞成件事，甚至願意出資之餘，犧牲部份投票權，以換取更多國家加入。
亞投行左右基建概念股
亞投行被視為喺美國主導的亞洲開發銀行外另起爐灶，點解中國咁着緊，一個理由係習大大全力推動的國際化計劃，受到美國暗中發功拖延，最明顯係中國競投墨西哥高鐵項目，明明中標都監粗拉倒，惹起美國出手堵截的揣測。對習大大來說，大陸依家提出「一帶一路」，在區內大搞運輸基建，打通交通經脈，希望同區內國家達致雙贏，若然要靠美國主導的國際金融機構去泵水，肯定無運行，於是決定成立亞投行，作為區內國家融資的新平台。
對於歐洲來說，當地經濟陷入困局，一樣好想同亞洲做生意，所以連英國呢個美國忠實盟友，今次都要講聲sorry，決定加入亞投行。雖然係咁，亞投行仲有唔少路程要行，中間仲有無阻滯無人知。中國要走出去，道路唔會平坦無礙，呢啲重大藍圖是否可以落實，都關係到「一帶一路」概念股以至其他中資股未來前景，有人話「一帶一路」係中國繼搞改革開放後，最重大政策，食粥食飯睇佢啦。
上證指數昨日大坐過山車，曾升穿3700點後急跌2.4%，最終微升0.1%收市，港股就無大陸咁勁，恒指昨收造24399點，都要跌94點；國企指數收報12005，跌172點，大跌1.4%，並唔可以好似A股咁跌完當無事彈番起，成交金額897億元。由於A股一度急跌，內地保險及證券股沽壓大，連升多日的平保(2318)，股價回吐番2.6%。內地股市玩波動拳，H股升市跟唔足，若然A股回落，要小心佢都跟跌。內地股市再抽高就有啲危啦。
藍籌股大致走軟，十送一紅股的生仔股恒地(012)逆市走高，收造53.4元，升3.7%，升幅是藍籌最勁；中國海外(688)獲母公司注入資產，同時去年多賺20%，全日收造23.55元，升2.9%，呢隻嘢近排比較弱，業績好可能略炒一炒。
科網股表現醒目
比較醒目的板塊係科網股。IGG(8002)急飆13%，創新支付(8083)、神州數字(8255)都急升11%，主板比較叻係慧聰網(2280)揚10%，金山軟件(3888)搞「雲計算」升完再升，昨日再彈5%。
呢排新股市場熱鬧番啲。焦點係全國第四大證券商廣發證券(1776)計劃發售14.8億股，當中5%為香港公開發售，將於25日起招股，招股價介乎15.65元至18.85元，入場費約3808元，4月10日掛牌，保薦人為高盛及廣發證券(香港)。
以招股價中位數計，集資所得淨額為248億元，當中一半將用於發展公司財富管理業務；兩成用於發展公司投資管理業務、投資銀行業務和交易及機構客戶服務業務；三成用於國際業務。該股已引入18個基礎投資者，包括富邦人壽、瓴睿資本同內地機構投資者。由於來頭夠大，加上券商股依家仲係當炒，散戶入表估計都可以博飲餐茶。
除咗廣發外，內地最大汽車玻璃製造商福耀玻璃(3606)截止認購，市場消息透露，公開招股初步錄得44倍超額認購，凍結資金336億元，成為今年新股「凍資王」，或會以上限16.8元定價。另一隻韓國手機零部件生產商高偉電子(1415)消息透露公開招股初步錄得4倍超額認購。我估內地概念新股都會炒一炒。
沒有留言:
張貼留言