內地股市連日暴漲，喺上證綜指衝向5000點關口，昨日上午最高見過4986點。中央見個市太癲，開始加強力度勒緊狂牛後，A股終於一碌就碌咗落嚟，上證綜指大插6.5%，收4620點。上海深圳兩市成交額合共2.45萬億元人民幣，再創歷史新高。恒指亦跟隨大跌，最多跌超過839點，尾市略彈，收市跌626點，跌幅2.2%，收27454點，國企指數跌518點，跌幅3.5%，成交2086億元。
A股呢次大力調整，證明係股市勉強就會無幸福。中央想股市升，但唔想隻牛行得太快，股民睇通條路，於是人人跑前頭，搞到慢牛變快牛，喺咁環境下，已經見到人民銀行今周開始停止逆回購的放水措施，話昨日開正回購(即係收水)，規模1000億元人仔，股市投資者聽到都腳軟。另外監管機構亦開始做嘢，有證券商開始增加融資限制。個市升得太喪，逼到阿爺要大力出手。結果A股在5000點大關前終於冷靜下來，出現遲來的調整。
升得太喪 阿爺出手
現時市場最關心內地股市跌完未。上證綜指本月8日低位4099點，升到昨日高位4986點，呢一浪升咗887點，昨日從高位回吐366點，跌咗升幅嘅41%，可能一日調整都未夠，跌得多或者先彈一彈，然後再下試。但呢一浪調整若然要跌約升幅50%，要跌多77點，去番4542點，估計上證綜指在呢個位有初步支持。
港股昨日跟隨內地大插，雖然幅度無內地咁勁，但恒指本來呢個月已經無乜升幅，家水瓜打狗，又少一截，埋單隨時成個月要跌。中環茶友話，5月係港股缺水月，外資通常無乜活動，今年頭四個月大市抽咗上去，外資手頭無貨，有啲唔順氣，死都唔肯跟。同內地股市比，佢哋幾乎全部係內地股民話事，想點炒都得，港股中資未係主場，少咗外資參與，好似得一隻腳跳吓跳吓。再加上從港股成交看，經常得1300、1400億，顯示呢一浸內地水落嚟香港炒亦唔夠多，令港股變成升得慢、跌就快，幾樣衰吓。
匯金減持 內銀腳軟
A股插得咁勁，除咗傳人民銀行抽走千億元資金外，又證實咗中央匯金公司減持內銀，是近期匯金首次減持「四大行」股份。據港交所披露公開信息，匯金本周二減持工行同建行A股，分別涉及16.29億同19.06億元人民幣。減持後匯金在工行A股的持股比例由46%降至45.89%，在建行A股的權益就由5.05%降至2.14%。
匯金減持令內銀H股亦遭拋售，工行(1398)挫0.19元或2.75%，造6.73元；建行(939)挫3.65%，收7.65元，中行(3988)挫3.7%，造5.19元。長和(001)為唯一錄得升幅的藍籌，收市升2.8元，造121元。
另外恒大地產(3333)昨早停牌。外電報道，恒大擬配售新股集資最多47.5億元，用於債務再融資及一般營運資金。報道引述銷售文件指，恒大以每股6.22至6.36元，較昨日收市價6.91元折讓8至10%。恒大股價過去一個月上升近12%，三個月累計上升逾1倍，股價升咗咁多，抽水減債兼搵吓投資機會，都可以話係正常過正常啦。
沒有留言:
張貼留言