人民銀行推出擴大質押試點究竟係咪暗推「中國版QE」，繼續成為內地熱猜的啞謎，人民銀行研究局首席經濟學家馬駿昨日否認新措施係QE的說法，吊詭係佢事隔差不多一星期至出來否認，而內地個市昨日就係佢否認下出力炒上2.3%，內地市場好似對壞消息免疫。
根據馬駿講法，央行將優質信貸資產納入央行質押品範圍，是消除央行向地方金融機構提供流動性支持的障礙，但不能假設所有地方法人金融機構將因此自動獲得央行流動性支持，不意味着央行將大規模投放流動性。他這個說法可令「七萬億元QE」之說降溫。
否認QE市照升
人行逐步試行「擴大資產質押」，被理解為釋放流動性，解決地方債務危機，甚至「中國版QE」，過去也有傳聞，馬駿亦有否認過。不過今次被傳為「七萬億QE」，就比過去更大規模，更具體，點解今次傳咗大半個星期才否認，無人係馬駿條蟲，當然唔會知道答案。而內地股市昨日都幾詭異，不但沒有受馬駿否認的影響，反而低開高收，滬深挨近全日高位收市，上證指數收報3338點，升75點%；深成指數報11229點，升327點，所以市場對壞消息毫無反應，相當離奇也。或者大家都知，阿爺要出盡法寶托經濟，雖然唔確定做乜，但繼續炒住先。
內地股市造好，港股前日下跌唔多，我已經話市底較強，昨日回升就有力，最多升501點，恒生指數收報22888點，升448點；國企指數收報10552點，升218點，成交908億元。未來有幾隻新股上市，焦點係中國華融(2799)，今次基礎投資者佔整個發售規模逾六成，當中遠洋地產(3377)認購的金額超過50億元，英皇集團主席楊受成認購1億美元。華融主業係處理不良資產，是第四季集資的大股，係佢招股前後，個市有力量維穩都唔出奇。
核電股呢輪起動，除咗話內地會加強減排，推動使用核電，另一個升因係國家主席習近平將會訪英，有說中國期望把核電走出去，呢個範圍會係洽談雙方合作的領域。
核電股依家龍頭當然係中廣核(1816)，同樣有個核字嘅仲有中廣核美亞(1811)，內地A股有中核。中廣核上市後表現曾經幾靚仔，掛牌升完一浸，係年中大升市再爆上高位5.5元。當時佢步大力雄，有啲係時勢造成，因為中核正在A股上市，成為炒作概念。通常呢類巨股都係大笨象，好難急升猛炒，故此A股快牛變呆牛，中廣核股價都大幅回落。現在核電概念翻炒，呢隻股勝在穩陣，但要持續急升恐怕唔易。佢回落見底後，依家順住個勢，持續炒吓反彈。
中廣核美亞改名變身
反而另一隻中廣核美亞，概念有點奇怪之餘，炒作空間可能大啲。雖然呢隻股有個核字，實際上卻唔係經營核電，只不過因為母公司係中廣核集團，故此有呢個名。
中廣核美亞唔做核電，主要生意是在中、韓從事電力與蒸汽的生產及供應，以及電廠及其他相關設施的建設及運營。母公司早前透露，會把公司定位為旗下唯一非核清潔能源平台，之前已作首次注資，注入的140萬千瓦風電及太陽能電站，管理層預計明年底之前，母公司將會對上市平台進行第二次注資，規模相信不小於第一次。為配合新定位，公司名稱會改為「中國廣核新能源控股有限公司」。
該股昨日收報2.14元，升5%。今年公司股價最高見過3.6元，應該係炒注資概念，喺A股暴跌下佢差不多打回原形，跌番去起步點。由於未來準備有動作兼正名，如果想炒新能源股，可以等佢靜一靜時投機性吸納。
沒有留言:
張貼留言