人行在上周六在官網發表公佈，會在九省市推廣「信貸資產質押再貸款」試點，呢個咁技術性嘅安排究竟搞邊科，大家初頭唔係好明，意思係銀行借咗錢出街，可以攞去央行抵押，借到錢再借俾人，藉以增加基礎貨幣。咁講聽落好似清楚啲，但實際影響係點，好多人都係不甚了了，直至有內地專家畫公仔畫出腸，形容呢個係中國版QE，同美國聯儲局開支票去買商業債一樣，仲估放水數量去到七萬億元人民幣。內地股市成個市都醒晒，上證綜指早兩日升完再升3.3%，一度重上3300點，收3287點，顯示阿爺係五中全會前落藥嘅威力。
港股有少少未瞓醒，由於這個中國版QE出台有少少隱晦，老外似明非明，港股升得唔多，最多升321點，午後升幅收窄，恒生指數收造22730點，升272點；國企指數收報10538點，升131點，成交唔係咁多，全日計都係872億元。成交未係全面大升，都幾反映市場對七萬億大水喉呢個說法仲未完全入信。
老外半信半疑
中國係九個省用試點形式增加可以用嚟抵押的資產，擴大銀行放水能力，點樣可以計出七萬億元，如果唔係阿爺肚裏條蟲，相信就算數口幾好，都唔容易計到答案出嚟，所以呢個數唔係街邊分析員的估計，更大可能係匿埋係領導人牀下底的知情人士放風吹出街。若然啲料太流，理論一早就被否認，但官方就不置可否，佢哋取態有啲含糊，唔排除係刻意保留彈性，一旦放水太勁經濟太熱，可以有調控的空間。
話阿爺放七萬億元來救市，一聽確係好驚人，因為2008年金融海嘯時，北京都係出了四萬億元救市，所以當呢個講法一出，老外都有小小半信半疑。我睇到老外主理的《華爾街見聞》好快就羅列咗對七萬億救市究竟係信抑或唔信兩種態度。
信呢招好勁的一派，包括內地《證券時報》，形容呢招係驚天大招，主要係話擴大質押可以彌補基礎貨幣缺口，顯示中央對定向調控堅持到底之之餘，同時加大對中小企放水，認為可以有效降低實體經濟的融資成本。
至於唔信者就叫大家不要自作多情，高估了措施的效果。這方的論據係增加了質押品種類唔等如大家就咁易借到錢，而且從政策意義上來說，只係人行增加融資工具，估計能夠產生的資金投放規模只有幾百億元。
優先關注內房板塊
兩派意見有正有反，陸羽仁睇法係人行以至整個北京「管理層」，係第三季增長數據未公佈前就出招，維穩的心態已經相當明顯。第三季GDP可能只增長6.5%或者少少，距離7%的目標較遠(其實講有7%增長你都唔好信啦)。今次話放水七萬億元咁多，係咪真無人敢講，但能夠嗌到咁大，至少顯示中央對保持經濟穩定的決心。
本來，內地喺金融海嘯時推出四萬億元救市措施，造成唔少重複建設，中央好唔想再出現相同情況。不過，內地增長經過一輪放緩，看來中央已經好難忍受下行風險繼續增加，今次措施就係想好大力咁將經濟推番上去。
喺呢個政策底下，無人估計成效最後會點，我覺得最好做法係將投資焦點放係體量夠大，能夠大舉推郁經濟的環節，好似房地產就符合呢個要求。中央依家期望可以催谷房市，谷到經濟引擎熱番，拉動整個需求環節，就要係呢啲大環節動手。本來，雖然中央想谷番郁樓市，但銀行對按揭或房地產商放貸仲係好緊，依家阿爺就要谷到銀行較為水浸，等個市郁番，所以如果阿爺呢招唔得就無計啦，如果得嘅話，內房有可能先浮上去，所以內房股可以追落後也。
沒有留言:
張貼留言