內地股市昨日早上再插3%以上，情景都幾嚇人，搞到港股想彈都彈唔起，下半場A股頂番上嚟，變成倒升1.2%收市，但香港股民都仲係無膽跟進，結果個市四連瀉，仲要跌得多過上晝，再創今年收市低位。
跌市之中，都唔係所有股份都插，出口股好似創科(669)在公佈業績前，股價逆市飆升，破30元大關兼創上市高位，高見30.15元，收造29.85元，揚7%。收市後創科公佈業績，上半年純利1.6億美元，升16.5%。
另外做手機配件的通達(698)主席透露，手機金屬外殼下半年定單理想，料有2至3倍增長。上半年金屬外殼佔手機業務比例逾10%，冀下半年可升至20%，消息令股價急升逾10%。
績優個股逆市升
出口股喺人仔貶值下升勢甚急，特別係創科更加創埋今年高位，高追好易遇回吐，反而部份被看淡的板塊，亦有受人忽略的績優股。內房股近日受人仔貶值影響一度受拋售，但昨日中海外(688)公佈截至6月底止中期業績，盈利163.2億元，同比升20%。期內收入648.5億元，每股盈利1.9元。
中海外管理層指上半年整體銷售不錯，合約銷售額854.5億元，按年升17%，仲話考慮到市場變化，將全年合約銷售額目標1680億元，上調至1800億元。由於業績靚仔兼管理層唱好前景，股份逆升0.1元，報收23元。?家已經8月中，全年過咗五分三，中海外夠膽調高全年賣樓指標，都幾睇好下半年銷售。雖然內房股依家唔係咁受市場重視，但呢類績優公司，等市場氣氛對呢類股份改觀時，就會易啲有表現。中海外股價近低位，等回吐少少可低吸。
另一隻業績OK逆市微升的內房股係碧桂園(2007)，佢中期盈利49.3億元人民幣，同比跌9.1%。每股盈利23.34分，派中期息每股6.48分，股價先跌後升0.01元，收報2.91元，證明市場對業績收貨。
有公司宣佈業績推高股份，但有公司業績唔錯但係見光死。國泰航空(293)中期業績盈利19.72億元，同比大升468%，每股盈利50.1仙。睇表面數字國泰算唔錯，但細看可能市場有啲失望，皆因油價跌到近年新低，佢業績仲未追得上早幾年最好景之時，主要係由於油價對沖成本、非美元區域外匯轉弱同競爭激烈有關，結果股價反瀉7.7%，收15.38元。
國泰股價見光死，除了因為業績好得來無預期咁好，公司對前景講得比較審慎都可能有關。管理層估計，未來客運表現相對較強，至於貨運業務上半年表現較強，但美國西岸的航運工潮完結後，貨運需求或會再受影響。第2及第3季的貨運表現較疲弱。
若要貨比貨，中海外調升售樓目標，國泰就話有部份業務放緩，雖然兩者係蘋果同橙唔能夠直接比較，但投資者反應會秤先邊一隻啲呢？機管局起第三跑道要到處開刀，國泰就唔肯同意畀飛機停泊附加費，?家自插兩刀，會否想增加自己唔同意畀多啲附加費的籌碼？
港交所終穿200關
呢排係公司業績期，撞着個市比較差，好多人無心機研究做吓分析，其實呢啲正係練功日子，?家留意有乜公司生意做得好，等佢低位儲點貨，總好過見好高追、見淡睇淡啦。
個股跟業績走，但大市就真係無運行，A股上晝急挫5%，之後傳國家隊證金匯金聯手入市，滬深拗腰彈升，最終分別升1.23%及2.18%，港股無人護盤繼續低位收市，恒指收報23167點，瀉307點；國企指數收報10642點，跌127點，成交918億元。個市乏晒力，港交所(388)一度跌穿二百大關，低見199.6元，收200.4元，跌1.28%，不過仲係唔算好平囉。
沒有留言:
張貼留言