天津爆出人禍，死亡人數和損失仍在點算中。由於爆炸規模巨大，市場直接反應係沽保險股同天津概念股，呢條數好易計，因為意外咁大劑，保險公司賠到嘔。本來，羊毛出在羊身上，通常跟住保費實狂加，有了先例做辦，照計無乜人敢再唔買保險，保險公司有機會蝕頭賺尾。不過，依家唔係大旺市，股民一見勢色唔對就先沽為敬。
內房股易敏感
內險股以太平保險(966)跌2.6%較顯著，其他中資股多數麻麻，最傷嗰隻天津港發展(3382)瀉咗13%，結果恒指跌咗176點，收報23814點，國企指數收10962點，跌97點。
個股方面，廣發證券(1776)與華泰證券(6886)，將取代中煤(1898)及廣汽(2238)，在9月14日成為國指成份股成員，廣發升0.13%，報14.98元；廣汽漲2.1%，報6.35元；華泰則跌2%，報15.64元；中煤跌0.26%，報3.83元。佢哋升跌似乎唔係因為指數，而係因為近排大市的口味，廣汽有得升，唔知係唔係因為對手有4000架車在天津港燒咗出唔到貨，會間接益咗廣汽。
萬科企業(2202)半年多賺不足1%，惟股價降3%，收18.2元，為包尾國企指數成份股，內房股被視為匯率敏感股，一有風吹草動就插一插，呢個反應唔止萬科會咁，其他內房股都差無幾，直到市場慢慢習慣匯率因素為止。另外萬科又關爆炸事，因為佢有個樓盤在天津爆炸區附近，損傷不少，唔止業主會否索償，影響市場對萬科的感覺(照計實際影響有限)。
呢次大爆炸事前無乜人估得到，都算係小型「黑天鵝」事件啦。黑天鵝唔常見，衝擊有幾多要睇事件本質，同時都睇市底強定弱。昨日個市跌過二百幾點後收窄番，一來係內地個市企番啲，仲有少少想試試滬綜指4000關咁樣；二來係沽售力量唔係咁強，睇樓成交金額只是658億元就知。個市弱，遇到細細隻黑天鵝都碌一碌。
成交少之下，有成千隻股份下跌。有中環茶友話，呢啲悶市最易玩殘人，最驚係佢靜靜吓無晒購買意欲，熬一排先插落嚟，咁就神仙都玩死，可能阿爺都明白呢個風險，所以不斷放出消息穩住個市同氣氛，一於同淡友鬥韌力。
昨日仲有單新聞可能唔係咁多人留意。領匯(823)公佈，與七間主要金融機構簽訂40億元四年期銀團貸款，年利率為銀行同業拆息加97點子。同一時間，有關收購上海企業天地1號及2號的交易，領匯已行使其於買賣協議所訂的權利，於2015年8月14日通知賣方成交日期延至2015年8月31日，代價的餘額(85％)將按付款日前的兌換率，以港元、美元及人民幣支付。領匯今年積極北上，先洽購北京商場，繼而洽購新天地，事前唔知點評估匯率風險。
領匯北上撞正貶值
領匯買新天地巿場本來有正面評價，覺得件貨有知名度，回報率又唔錯，覺得佢係趁羅公子等錢使執佢平貨。?家單「刁」未完就撞正匯改，交易有八成半錢未畀，變成買平咗，但如果匯率不變，將來租金折回港元又會少咗。以領匯資產值來說，目前投入內地的比重只是「濕濕碎」，主要影響都係觀感，最重要嘅係管理層點評估將來在內地投資嘅風險，同基金點睇呢個發展策略。
另外領匯股價同美息走向呈反向相關，美息上，佢就落，美國10年債息今年1月見底，領匯就在1月見頂，美國10年債息如今2.18厘，仲有反覆向上空間，所以領匯一級級咁落，收購消息都無乜刺激，股價暫時未有見底回升跡象。
沒有留言:
張貼留言