港股繼續升，創o左七年新高，經過一段時間攀升，好友成街都係。恒地(012)主席李兆基一早叫人買股好過買樓，呢輪佢就上調目標價，水晶球最新貼士係睇29000至30000，咁o既預測今時今日算保守啦！
恒指先升後跌，曾高見28213點，但二萬八水平再遇阻，加上內地PMI數據欠佳，港股午後向下。
恒指全日報27827點，跌106點或0.38%。國指跌191點或1.3%，報14478點。大市成交額1917億元。
近日熱炒的電影股昨日繼續爆上，星美文化(2366)一度喪升59.2%，收市仍升35.7%；母公司星美控股(198)升6%；橙天嘉禾(1132)大漲12.9%；寰宇國際(1046)狂飆33.3%；比高(8220)也急彈18.2%。
又到政策觀望日
港股依家炒資金市，已經無乜邊個公開做淡友。金管局前晚第九度接招，數額已經細o左，資金轉去炒落後同埋搵股仔落鑊。今日又係星期五，照炒A股o既玩法，又係政策觀望期，好多人都會諗吓食胡，所以昨日香港下晝個巿已經軟軟哋，唔跟內地市升。
個股炒炒吓，本來呆呆哋o既電視廣播(511)，就因為有內地娛樂猛人入股煲起o左。唔知係咪大家忽然覺得免費電視好做，遠東系大股東邱達昌有意申請免費電視牌，同系股票都湧上。
今次入股無綫的娛樂大亨黎瑞剛，係內地搞o既文化產業基金非常成功，最為人熟悉係搞過內地出名節目《中國好聲音》。
有見過黎瑞剛o既人話，感覺佢好醒，熟悉中央政策o既需要，而且能夠落實，有操作性，加上佢在上海做過高官，高層人面熟，所以能夠咁快冒起，而家佢係上海大搞文化娛樂產業，甚有氣勢。佢入股無綫，暫時未有大動作，但已引起關注。
內資做大台股東，有人從政治解讀，陸羽仁集中經濟一瓣，覺得對無綫應係利好，令佢本來發展空間大o左，從市場反應都說明歡迎入股消息，昨日升3.6%，收50.45元。
電視廣播雄霸香港多年，創辦人邵逸夫賣盤後，大台繼續威，不過生意就已經唔易做。去年市道平平穩穩，但佢盈利已經倒退兩成，今年成本再升，雖然唔使再俾世盃轉播，盈利都唔易搞番好靚仔。
如果講數字，電視廣播勉強算大件夾抵食，15.7倍市盈率，派息都唔錯，有4.9厘息，但佢主要市場飽和，加埋受網媒衝擊，估值都幾難畀得高，所以一直有傳部份股東想沽貨，而家仲搵到猛人接棒?。
無綫終於有概念
依家全世界都睇緊內地市場個餅，電視廣播如果無o左大中國夢，淨係靠盈利同派息硬頂，肯定惡啃兼無前途，唔怪得有人聽到入股消息，話無綫終於搵到概念啦！若要揸藍籌，揸佢好過揸匯控(005)啦。
沒有留言:
張貼留言