自從話北水南下，港股變得「A股化」後，急升暴跌成為新常態，萬億巨企大上大落，同樣變成司空見慣。港股上周五同周一急插，昨日以為佢會再調整，尤其新華社出文，叫股民留意風險。
不過，喺資金持續流入，金管局前晚同昨晨都要入市放出港元下，有人話係外資補倉，恒生指數高開後愈升愈有，夾到沽空者都幾傷。
中移變淡友碎肉機
呢排金管局似乎好唔得閒，資金繼續流入，港元匯價維持強勢，金管局在港股收市後，於歐洲市場時段再入市，向市場注入77.5億港元，令星期三(23日)銀行體系結餘預測增至2923.13億港元。
市場正路解讀係外資流入，但好多人個心當然仲係問緊錢真正從何來。熱錢流入，人民網最新刊登文章，指A股牛市背後是中國發展戰略的宏觀支撐，以及經濟改革的內在動力。
不認為牛市背後是泡沫，甚至指4000點才是A股牛市的開端。
文章仲話，不能把資本市場當作賭場，只注重短期投機。如果將A股看作「中國夢」的載體，那麼蘊藏的投資機會是巨大的。
有中環茶友笑言，呢排官媒做股壇紅綠燈，睇到香港股民眼都花！
指數升得勁，但大股就扯上扯落大CHOK CHOK，最明顯係隻中移動同兩架神車。
中移動早排股價跟住個市飆升至115元，跟住被人話佢業績倒退質落嚟，但昨日有外資話睇好佢首季服務收入有驚喜，按季升1.6%，按年只跌0.3%。
瑞信認為，中移今年資本開支指引按年跌6.5%至1997億元人民幣，同時管理層計劃縮減資本開支規模延長至2016年，因此對前景感到樂觀，重申目標價133元不變，結果中移動開市就借頭借路炒上8.1元，係推升指數一大功臣。
指數狂升，表面係話外資補倉，但睇隻中移動咁升，我話似夾淡倉仲多啲。
上個星期五夜期插七百幾，周一開市彈二百幾點，來回九百幾點，跟住又插六百幾點，今日最高彈八百幾點，唔好話散戶俾架過山車拋到暈晒浪，大戶企錯邊都被人夾死！
內地炒家興板塊圍攻
有人歡喜有人愁，大市前日跌六百幾點，昨日升番突，但係周一暴跌嘅兩架神車，仲要逆市俾人插多一腳。南北兩車合併市值大過波音，早已被外資唱淡，但過去內地股民一直睬你到儍，去到周一兩架神車H股齊齊跑過20元創新高，跟住大戶就嚟料嘞，由高位直接落去，仲要狼到個市彈升七百點，佢再逆市插多一成。
有中環茶友話，呢啲咁暴動式炒法，係典型內地式炒法，內地大戶小戶都係兇狠成性，圍住一個板塊就係咁砌上砌落，尤其好似神車呢類A股主導的股份，基本上外資無乜貨，點舞都係內資話事。
神車撞埋一堆，搞到成個基建板塊血流成河。南車(1766)報15.52元，大跌2.18元；北車(6199)16.24元，瀉2.36元；中鐵(390)造10.3元，瀉1.2元；中鐵建(1186)造14.8元，大跌1.1元或6.92%；中交建(1800)報14.52元，跌0.7元。
個市不同板塊各走極端下，加埋好多細股炒到飛起，包括幾隻本地證券股。恒生指數喺A股反覆向好下愈升愈有，尾市最多升831點，高見27925點，收造27850點，升755點；國企指數收報14531點，升419點，要留意係成交縮減至1830億元，似乎好多人見個市郁得咁勁，都寧願睇定啲，搞到成交縮咗。
沒有留言:
張貼留言