慘案成因係升得太急
內地股市暴跌，搞到變成慘案，從牌面睇確係幾得人驚。內地專家為跌市提供咗幾個解釋，最直接當然係證管機構對融資融券，即係香港講的「孖展」業務的巡查，同時仲罰咗幾間被發現違規的大證券商；再者就有中信證券(6030)被大股東減持，呢啲消息都令到內地金融股被拋售。另外，今個星期有幾個重要數據公佈，以及中央傾緊股票係咪採用註冊制，令市場擔心未來股票上市門檻大降，都係促成跌市的原因。
陸羽仁形容「1.19慘案」表面幾得人驚，但個市咁插落嚟，實際上唔係一日半日內形成，股民如果稍為有風險意識，應該都會意識到個市在急升後想借勢調整，終於被佢等到今次證券商受罰的機會。
熟悉內地市場的人都知，內地現在搞孖展融資唔係咁規範化，監管機構唔巡查就無事無幹，一查就幾乎肯定出事，呢類家常便飯，照計無理由會食死人喎。有人因此就會問，咁監管當局喺呢個時候有所動作，是否想整死個市先？
調整反而方便政府出招
一個較合理答案，係這類巡查經常要做，政府見到個市升咁多、升咁急，更加無理由唔做，一做自然捉到人違規，咁就當然要罰，但如果你話監管部門係覺得牛市去得太癲，要徹底打死佢，睇落就唔係咁似。相反，家內地經濟仲未係咁好，中央無理由想資產市場衰，個市稍為調整，有番啲回調，可能仲令到政府比較放心推出提振措施。
如果有人問咁家是否入市撈貨機會，我會問番佢咁你是否相信內地牛市已死，如果你信呢套，咁梗係唔好買啦。如果你相信大市只係調整，應該點做就唔使人教啦！經過「1.19慘案」後，上證綜指已經去番三千一百點，唔排除短期佢仲會再落，試試三千點都唔奇。
但唔好忘記，散戶如果跌時唔敢買，升時走去追，咁博法風險其實仲大，好似內銀這類低估值大股，雖然喺低位升了不少，但市盈率仲係6倍，息口有5至6厘，好過銀行存款一大截，低撈風險又有幾大呢？
低撈內銀風險有限
睇番個市，最多跌513點，低見23590點，尾市險守23700點收市。恒生指數收報23738點，跌365點；國企指數收報11475點，跌600點，成交增至近1279億元。
中國證監會點名12家證券商，在融資融券業務上違規，決定暫停中信證券、海通證券(6837)及國泰君安(1788)母公司新開融資融券帳戶三個月，觸發證券股遭拋售。海通證券大瀉16.5%，報15.36元，是表現最差國指成份股。
被大股東減持的中信證券急插16.5%，聽聞今次減持其實都同佢係海外收購，考慮符合當地持股規定有關，點知就撞正跌市，變成插得特別傷。
內地股市重創，內險內銀股都無運行。龍頭國壽(2628)挫6.8%，報29.6元；平保(2318)重創8%，報81.2元；內銀股亦被牽連，交行(3328)大跌8.1%，是表現最差藍籌。
A股暴瀉下，相關ETF被洗倉。揸得重金融股的安碩A50中國(2823)插咗近12%，其他A股ETF都有接近一成跌幅，早前高追者損手爛腳。但我就話現在開始可以分段低吸喎。
沒有留言:
張貼留言