內地A股升不停，中環茶友笑言，內地經濟起飛，港人由此淪為港燦。現在A股爆上，內地股民身家日日漲，假如情況一直落去，一向以炒嘢叻自豪嘅港燦變埋股燦，你話係咪顏面何存，自尊心受損呢？
本地證券股開始癲
茶友咁講，都幾反映香港投資者嘅心情。你話如果早排有聽陸羽仁講，低撈內險內銀股，都叫做心理平衡啲，否則?家心情真係衰過撞正跌市呀！不過，炒股係心理遊戲多過智力遊戲，股民遇着呢啲A股大時代，最緊要理智行事，你見個巿癲想短線跟炒唔緊要，最重要係唔好誤將投機變投資，瞓晒身兼磨爛蓆。係呢啲市，最好係順勢而行、適可而止，贏份禮物過聖誕。
內地公佈貿易數字較預期差，但市場不為所動。消息入市後，內地A股照升，港股一度仲彈升多啲。中環茶友話，今年中央定了7.5%的增長率，前三季已經係勉強之餘，仲有減速情況，?家睇起嚟第四季都唔係咁樂觀，所以全年目標做唔做到，已經唔係咁有把握。
正因為咁，加上日圓猛貶同油價急挫，兩者都增加咗內地通縮風險，所以阿爺先喺年尾急急腳變招，兩年幾以來首度減息，結果誘發內地股市生咗隻小狂牛出來。由於增長放緩成為中央開水喉的理由，所以股民聽到數據唔好，完全當佢無到。呢種實體經濟同股市脫晒鈎現象，唔係內地獨有，亦唔係今日新生事物，係09年金融海嘯已經出現過。
經濟差，平錢充斥方便靠炒搵食，最受惠係「鑊鏟界」，所以證券商股、保險股炒到癲。
恒生指數三連升，收報24047點，升45點；國企指數收報11873點，升272點，成交金額近1230億元。港股連續六日成交破千億元，港交所(388)係少數升得好嘅本地藍籌，全日進帳5.9元，造183.9元。
上證指數上破三千點大關，內地證券股升勢續凌厲。滬杭甬(576)突然單日炒上12%，收10元，皆因該股透過附屬公司持有浙商證券權益。至於本地證券商股都全力追落後。英皇證券(717)升近倍，收報1.09元，是港股最標青股份；耀才證券(1428)飆28%，報1.82元；時富金融(510)炒上逾23%，睇嚟佢哋只係開始鬥癲。
聖誕鐘 濠賭燶
以前聖誕鐘興炒匯控(005)，近年大節臨近興炒濠賭股。不過，匯控?家無得炒，昨日佢升0.3元，報77.35元，仲係大平賣價。濠賭股仲弊，變咗聖誕鐘、佢炒燶。澳門特首崔世安表示，政府已下調明年博彩業每月收益預測，從今年的每月300億澳門元，降至275億澳門元，濠賭股於是再衰。銀河娛樂(027)，造46.8元，跌1.25元；金沙(1928)報39.85元，挫1.25元；永利澳門(1128)瀉1元或4.37%，收21.9元。本來滬港通前，有的分析員話佢係內地股欠缺的板塊，認為有得炒，結果輸到成地眼鏡碎，睇嚟呢類股短期唔會有運行。
印刷電路板生產供應商恩達集團(1480)首日掛牌，收報1.36元，仍較招股價1.23元高11%，高潮應該係等隻中廣核掛牌嘞。
沒有留言:
張貼留言