內地個市真係似牛市，而且一開波就係一頭小瘋牛，資金大舉入市，前一個星期五仲話滬深兩地股市昨天成交合共7000億人民幣，已經好高，點知到上星期更升到1.07萬億人民幣，突破萬億成交大關，認真驚人。
個市短期升得又快又急，當然有回吐的可能，有時單日升跌都好驚人，好似上周五，上證綜指走勢有如過山車，早上10點幾一度從高位急跌近6%，之後反彈，下午走勢轉強，收市報2937點，仍有1.3%之升幅，即係單日已經上落7%。
阿媽同仔 大細分明
港股基本上被內地股市拖住走，繼上周四急升逾400點後，上周五跟內地玩過山車，早上10點雖曾一度掉頭向下，但已迅速重拾上升動力，升幅一度擴大至逾300點，午後大致保持升勢，全日收報24003點，升170點，升幅為0.7%。港股當日成交額為1477億元。
港股呢排自己唔係幾想升，但被內地帶住向上，非紅色股升幅有限，匯控(005)跌0.1%。睇住港股同內地的成交，有啲感慨，香港1400幾億成交本來已好勁，但遇上內地1萬億人仔、即係近1.3萬億港紙成交，內地股市係香港近10倍，阿媽同個仔的格局已十分分明，黑心啲講，唔好望人民幣太快自由兌換，唔好望內地太快撤銷外匯管制，否則真係唔係幾明白，點解仲要炒港股。香港只係靠金融、地產、旅遊開飯，其他嘢唔係幾識做，放長雙眼睇有啲危。
見到內地呢種瘋牛市，好多人關心有無得炒。我有幾個觀察，第一短線升太急可能回一回。上周五早段的回吐就屬此類，其中一個擔心是明年經濟增長目標會調低，上周五政治局常委會開會，已敲定本周二中央經濟工作會議的基調。
摩根資產管理環球市場策略師譚慧敏指出，市場預計下周中央經濟工作會議，將明年經濟增長目標調低至7%，但不排除最終會定出一個更低的目標，例如6.5%，屆時內地股市難免有短期調整，但她仍睇好A股市場的中線走勢。
短線小心 即日計數
如果你短線都唔捨得走，炒Day trade(日中交易)都可以，有個股壇老雀就係咁，佢話幾年無炒過，見到A股咁好手痕，就每日開市睇住A股炒乜，一見略回就追入相關H股，食幾個巴仙，多數即日走，若要留過夜，就一定要有幾個巴仙賺價在手才會留，唔生唔死或略略輸錢就即日了結，佢近排都主要炒內地保險、證券股，在呢啲狂牛市，咁炒day trade都搵到三茶兩飯，不過散戶要返工唔貼市好難學。
A股短線升得咁勁，有傳溫州炒樓兵團最近「沽樓炒股」轉戰股市，作風進取，大手掃貨。阿爺都想股市升，但升得太急又好似有少少擔心，所以開始有示警聲音。新華網上周五發表題為「火爆A股把豬吹上天」文章，提醒投資者千萬不要賣房炒股，切忌腦子發熱，要小心瘋狂過後的代價。中證監亦提醒投資者要小心風險，量力而為，又呼籲不要盲目聽從「賣樓炒股」的建議。講多兩講若然個市唔聽講，阿爺可能搞啲小動作壓一壓，例如在市場收一收，嚇你一嚇都唔奇。
但我對內地個市中線走勢，唔敢睇淡，認為以半年計，內地股市還可再上層樓，上證綜指4000點有機會到達(上周五報2973點)。主要睇宏觀大局，內地股票即使經過近期上升，仍然唔貴，以大大隻的內銀計，工行(1398)現價5.7倍市盈率，6.1厘息；建行(939)5.6倍市盈率，6.2厘息，佢哋呢啲大股得咁低市盈率，點叫得貴？出現呢種價，係因為外國和內地投資者都唔睇好，外國投資者怕內地樓市崩潰、銀行崩潰，所以唔買。內地投資者過去集中炒樓，炒股都炒細股，股市又唔熱，所以都唔買。
中線看好 升浪未完
唔係話內銀經營前景一定得，但要炒起內銀亦好有理由，5倍幾市盈率係預計咗佢哋未來盈利會大跌，如果盈利只係唔生唔死，唔升唔跌，好似中移動(941)咁，都有12.3倍市盈率，即係只要市場觀感改變，內銀都可以升唔少。
過去老外唔睇好中國經濟和股市，內地亦無動力炒，官方又無大力推，個市就死死吓，如今阿爺似乎想推高股市，借此推吓經濟。
中國社科院的講法可以參考。社科院金融市場研究室的2015年「金融藍皮書」很快就會出爐，對明年股市的測算是上證綜指可能會升至4000到5000點，比現價有30至70%的潛在升幅。社科院金融市場研究室副主任尹中立話，看好明年A股的理由，在於一方面市場已形成牛市氛圍，吸引更多資金入市；另一方面，藍籌股相對仍然便宜，尤其是內銀股的估值只有5倍市盈率，只要市場信心恢復，市場對內銀股的風險溢價會降低，當藍籌股的估值與國際市場的平均水平接軌，勢必會帶動大盤指數上漲。藍籌股是未來的主要上漲方向。從歷史經驗看，2007年上證綜指從3000點升到6000點，大量資金買的是藍籌股而不是細價股。
社科院的預測之所以受人關注，因為佢哋去年已看好內地股市，會重演1999年開始的升市，家睇預測好準。尹中立話，2014年的股票市場與1999年股市起步上升，有不少相似之處。從內地情況看，經濟處於不景氣時期。從國際金融環境看，處在美元上升周期，內地銀行信用擴張受到制約，政府必須倚重資本市場融資。從政治周期看，都是在領導人換屆的第二年。換屆第一年的主要任務是人事調整，新領導人在三中全會上提出治國施政綱領，第二年則進入實施階段。在國內外經濟不景氣的背景下，為了維持經濟增長，各種政策工具勢必會輪番使用，股市作為政策工具之一，自然得到關注。
簡單總結，內地股市短期升得太急可能回吐，但回吐卻是吸納機會，建倉睇多三個月至半年。要避開本港股票，買紅色大股，熱門股是如平保(2318)這類保險股，冷一點是內銀股。若然怕買股風險太大，在回吐時買番一張半張國指認購期權，100點期權金都係5000元，預咗輸晒，可以博吓刀仔鋸大樹，記住小賭怡情，唔好瞓身。
沒有留言:
張貼留言