港股呢排真係弱到無朋友，美股挑戰再創新高，內地股市企穩，唯獨港股升完之後好快再插過，跌穿24000點。9月埋單前個市壓住結算，大戶可以話如予取予攜，唔使理外圍係升定係跌。
外資入內地居多
有說法美股升、港股跌係因為日前內地媒體傳出人行行長周小川會被撤換，令人關注內地權力轉換會唔會影響財金系統，以及內地貨幣政策係咪出咗問題。對於呢個講法，先唔講內地已否認換人，就算講法有根據，照計應該內地股市反應大過港股，無理由港股仲要帶頭跌喎！隨時因為係期指市場係淡倉底，要壓住結算。
有中環茶友分析，話佢聽過一個講法，係滬港通下個月嚟料，初步估計反應係外資流入內地市場，興趣會大過內地資金買港股，原因一來係中國股市仲喺低位；二來係過去外資唔係咁多渠道可以投資內地，唔同內地人要來港開戶炒股咁方便，故此開通時北上的錢會多過南下，由於預期北上熱南下冷，港股要等中國股市熱起來先有機會跟炒，醒目資現時就沽咗貨先啦。茶友話，如果根據呢個分析，個市短期熱極有限，股民若有興趣中線投資，都係等佢跌多啲喺低位分段買貨，然後等兩地股市開通後出現互動。
港股弱過藥煲，全日先升後挫，挨近全日低位收市，恒生指數收報23768點，跌153點；國企指數收報10640點，跌76點，成交金額808億元。
IGG(8002) 股價及相關新聞 一早錄得大手上板，每股作價3.99元，涉及9600萬股，有人大手沽貨套現3.83億元，市傳為基金股東IDG-Accel China Growth Fund及IDG-Accel China沽貨。受配股消息拖累，該股今早應聲急插，失守配股價，昨日收報3.73元，大跌逾13%。
睇番呢隻嘢喺年初科網股熱潮，股價升破10元大關，創過10.92的高價，家跌咗接近65%，幅度雖然無2000年科網股咁勁，但高位接貨者已經損晒手。家佢市盈率仍然有62倍，資產淨值係0.775元，基金見到阿里上市的刺激已完，就算家個價同高位差咁遠，都掟咗貨先至算。
除了政策因素，中港兩地前景麻麻，都係入市資金減少的原因。瑞信集團董事總經理陶冬於記者會表示，維持今年中國經濟增長7.3%預測，估計第三季中國經濟增長7%，第四季介乎6%至7%增長。
10月或減準備金
由於中央政府已釋出訊息，指不介意經濟增長略為低速，以換取推行結構性改革，相信中央政府今年餘下時間不會推出重大刺激經濟措施，佢唔排除若果經濟繼續下行，10月人行或減一次存款準備金率。
香港方面，陶冬好坦白咁講，第二季本港經濟令人失望，主要是由於服務業、出口下跌，當中包括旅客減少來港消費。他相信，疲弱情況或持續，但下半年會有改善，不過，整體本港經濟令人失望，預計今年本港經濟增長2.2%，「滬港通」帶來資金流入，將增強本地流動性，支撐本地樓市及資產價格明年增長3.2%。
其實，唔使陶冬講，睇番市面都已經知，「十一」就快到，但今年大家都估自由行唔會多，除內地打貪外，個別偏遠地區傳話香港爆發社會事件，都有小小影響，故此零售股今年索性棄守黃金周概念，澳門博彩股仲衰，係假前持續下插，所以大家唔好諗炒黃金周股份啦。
沒有留言:
張貼留言