人仔在岸和離岸早盤價差一度近500點子，離岸價跌得比在岸價多，兩者差幅創近一個月來最大。離岸人民幣對美元早盤一度跌至6.4045；在岸人民幣對美元早盤最高6.3520。市場人士話，之前人仔反彈，在岸和離岸價相當貼水，自上周末中國央行雙降以來 ，在岸離岸人民幣價差持續擴大。另一個跡象係呢兩日金管局接錢數量又見增加，顯示內地人民幣拆倉再度出現，資金繼續泊來香港。
雙降效應如期浮現
內地為了增加經濟體系流動性，決定減息降準，分析家普遍認為，以中國目前通脹狀況同息口水平，雙降問題唔大，唯一要顧慮係減息同放水，會增加貨幣供應，加上存款利率降低，令人民幣受壓，造成資金流出。當然，人民幣唔係自由兌換，匯價唔係完全由市場決定，所以措施出台初期，人仔匯價反應唔算太大，但呢兩日似乎市場關注的情況開始浮現。
內地爭取人民幣加入國際貨幣基金會的特別提款權(SDR，即是儲備貨幣)，條件之一是增加貨幣的市場流動性，換言之，雖然人仔唔係自由兌換，但內地如果想取得提款權資格，就要減少人為令匯價企硬唔郁，在岸價要跟從市場指導的離岸價移動，呢個情形就限制咗阿爺干預匯價的空間，想干預要在本地和海外市場入市干預。而且，人民幣下跌基本上對中國出口唔係壞事，所以市場開始預期人仔有下調壓力。
人仔下跌，中港兩地股市面對內地資金流出陰影，唔多唔少係延續雙降後出貨的調整勢頭，加上期指就快結算，變成買意不足，尤其係內地股市午後回落轉急，滬指未能守住3400點。上證指數收報3375點，跌59點；深成指數報11494點，挫264點。
同內地相比，港股跌幅細啲，恒生指數收報22956點，跌186點；國企指數收報10558點，跌156點，成交只有610億元。各類股份跌幅較多係內銀，建行(939)、工行(1398)及中行(3988)合力砌低恒指76點。三隻股份建行跌1.9%，報5.72元；工行挫2.5%，報5元；中行跌2%。
我覺得國企指數跌幅比內地略少，同人仔匯價有啲關係，因為內地機構拆倉，資金就流入香港，加上港元係同美元掛鈎，同人仔匯價關係間接啲，所以就無跌得咁多，故此觀察呢兩日市況，匯水會係一個因素。
對於內銀受新一輪寬鬆措施有何影響，評級機構穆迪認為，有關動作將提高銀行體系流動性，降低其借貸成本，有助緩解中國經濟增長放緩的影響。另一方面，人行此舉也會對銀行盈利能力產生壓力。
內銀下滑候低吸納
據穆迪助理副總裁尹勁樺分析，人行降息降準對銀行資產質量的影響不一。貸款利率降低將減輕諸如政府相關投資平台等高槓桿借款人的還款負擔。然而，降息難以抵銷宏觀經濟下滑的影響。
佢認為，息差下降可能會促使某些銀行為追求更高的貸款收益，而增加對高風險客戶的敞口，從而在短期內使其風險控制能力面臨挑戰。與此同時，放水可能會推動銀行向中小企業和一些過去難以得到信貸的行業放貸，長遠有利中國經濟結構調整。即係話短期有衝擊、長期有好處，所以個市呢幾日下跌，但跌到咁上下，投資者就唔需要睇得太淡，就算係內銀股都可能會彈一彈。
例如隻中國銀行(3988)，昨日跌2.1%收3.73元，若回到3.57元，剛好是回吐這浪上升的50%，可以吸納，博一博佢消化完可以再上。
沒有留言:
張貼留言