港股呢排頭頭碰着黑，內地A股急插搞到恒指一日下挫二千點，中央救市穩定番之後，昨日又因為美國科技股業績唔靚仔插咗二百幾點，可見市底都係虛虛哋。
美息看升 美股難爆上
美國科技股早前爆升，納斯達克指數創出新高。呢個星期幾隻龍頭大股派成績表，結果被指低於預期，杜指下挫一百八十多點，納指就跌十點，幅度反而細過杜指。美股高位回落，港股再度腳軟，變成跟跌唔跟升。早兩日大市回勇，但成交不足千億元，睇番北上投資A股滬股通額度，全日額度剩餘134.34億元人民幣，是連續第三日全日賣盤超過買盤，顯示兩地資金唔夠，內地穩定咗指數，但投資意欲不振，港股坐埋一條船，於是變咗孱仔。
美股借科技股業績調整，陸羽仁認為背後係市場開始預期九月美國加息，在利率調高下，市場風險胃納降低，杜指上到一萬八千點就開始有壓力，短期見唔到佢有力爆上，高位就借啲理由調番落嚟。喺呢啲咁嘅市況，股民要保持有現金在手，買股唔能夠心急，就算想郁手都要等個市回落先行動，咁就穩陣啲，簡單來說，就係要揀飲擇食，寧缺無濫。
美股回調，恒生指數低開，午後跌幅擴至359點，都有啲得人驚。不過，內地股市回升收市，尾市跌幅收窄，恒生指數收造25282點，跌253點；國企指數收報11734點，跌137點，雖然波幅增加，成交都係817億元。港股成交奀，港交所(388) 股價及相關新聞 跌6.2元，造222.2元，預計個市無乜好消息推動下，短期成交好難大上，港交所短期下試二百元低位都唔出奇。
市場昨日話題梗係蘋果公司(Apple)業績展望差過市場預期，多隻蘋果概念股捱沽。瑞聲(2018) 股價及相關新聞 挫6.9%，報41.45元；高偉電子(1415) 股價及相關新聞 瀉8%，造6.23元；富智康(2038) 股價及相關新聞 下滑4%；舜宇(2382) 股價及相關新聞 降3.4%，報17.46元。
理文手袋(1488) 股價及相關新聞 賣盤交易告吹，復牌後應聲急跌，為表現最差港股，收報1.13元，急跌20%，股價最低曾經跌到去1.05元。
據公司講，接獲大股東告知，鑒於訂約方未能就有關交易條款達成協議，故與潛在買方就可能購買理文手袋全部或部份股份討論將不會繼續進行。理文喺五六月期間，仲喺四、五毫子徘徊，由於憧憬賣盤，股價急衝，最高上過1.99元，就算A股暴挫期間，佢都繼續頂得好硬。?家賣盤消息告吹，短期應該無得炒作。
殼股買賣唔易成交
市場人士話，?家賣殼有兩種方式，若然買家名氣大，就興低價發股，以攤薄方式轉換控制權，大、小股東趁買家號召力推高股價，自己執生搵機會散水。另一種買家名氣無咁大，就要真金白銀高價收購。
內地股市碌低，少咗炒股熱錢，買家未必即刻肯再畀高價買嘢住，沽家就認為內地變相叫停新股集資，殼價有條件炒上，亦都唔願意賤賣。喺買賣意向差距擴大後，堅持想高價賣殼短期就比較難成事。
市況唔穩定，投資者眼光轉向業績有保證公司發掘機會。大和估長江基建(1038) 股價及相關新聞 與電能實業(006) 股價及相關新聞 合併，變身成為基建巨人，兩隻股份雙雙造好，長建收63.95元，升1.7%；電能造70.55元，輕微下跌咗。
買績優股有息收，策略進可攻、退可守，難度係好多都價錢唔平，買呢類股份唔會發達，但係連iBOND都大把人排隊的環境下，佢哋自然唔缺捧場客。但想買呢類股份都唔可以心急，要等機會趁市況唔好，個價低啲先至吸納。
沒有留言:
張貼留言