內地股市最古怪係早上傳出中證監開會研究點樣退市，仲講到點樣沽股套現，包括分股畀證劵商呢啲講法。阿爺啱啱先頂住期指結算嘅洪峰，忽然間話佢想退市，甚至沽股，一聽都覺得離奇，但個市唔知係咪俾佢咁搞一搞，有小小唔知應該炒上抑或炒落的感覺。
謠傳阿爺沽股退市
到了下晝，中國證監會新聞發言人張曉軍表示，有關報道不實，認為相關媒體對市場有重大影響的報道，未有與監管部門核實是不負責任。他強調，下一階段證監會將繼續將穩定市場、穩定人心、防範系統性風險作為工作目標，全力做好相關工作。
我話中證監退市的傳聞，用常理去諗都覺得奇怪，因為中央依家都未肯定救市工作已經敲定，點會咁快話退市，出到放流料的招數，莫非淡友已經無子彈？要留意今次傳出消息的不是網上無名留言，而係有名有姓的媒體，點解媒體會搞出咁樣的消息，肯定又有一番議論。從呢次假退市消息，內地好淡雙方鬥法仲係好激烈，投資者聽到消息真係要好小心分析。
中證監澄清退市報道，一度帶動上證指數再急升，其後獲利回吐，上證指數全日收報3992點，升34點，升幅0.9%，深成指數全日收報13202點，升197點，兩市成交增至1.3萬億人民幣。港股喺內地波幅收窄下買賣兩閒，恒生指數收造25404點，微跌10點；國企指數收報11773點，跌76點，成交金額只有849億元，港股成交咁奀，港交所(388)下滑咗3.4元，造231.2元，我估港股成交仲會再縮。
內地股市經歷暴力救市，短期陷入拉鋸。美元美股呢排強勢，納指幾隻巨無霸好似谷歌(GOOGLE)、面書(FB)都爆上，特別谷歌因為業績好單日爆上16.6%，令到中港科網股相對硬淨，騰訊逆市向好，收造155.5元，升1.9元，升1.2%。港股如果無乜方向，唔排除會跟外圍炒個別股份。美國有加息傾向，資金流向炒作對息口無咁敏感的科技股，尤其對辦的龍頭大股，唔排除股價高處未算高。
美元強，黃金自然無運行，尤其依家連中國大媽都少了買金。金價在亞洲時段曾失守1100美元大關，由上日收1132美元，怒插到1080美元，雖然在黃昏時段彈番上1110美元，但都跌咗1.9%。多隻金礦股捱沽，紫金(2899)瀉跌6.3%或0.15元，造2.23元；招金(1818)挫0.17元或4.3%，造3.77元；中國黃金國際(2099)插0.6元或5.12%；SPDR金ETF(2840)下滑2.6%，報829元，咁跌法炒金都幾傷。
金油腳軟大勢未改
黃金暴跌穿位，和美息向上有關。美國息口趨向可以改變全球資金流向同風險胃納，喺加息機會增加下，投資者要睇多兩眼留意。除咗金價外，油價都同美元有密切關係，所以短期產油相關股份都不宜沾手，相反用油股份可以逢低吸納，好似呢排走勢強勁的航空股，繼續有好表現。
另一隻低油價受惠股份仲創埋新高，就係做巴士的載通(062)，載通主要經營巴士業務，包括九巴、龍巴、陽光巴士等，去年溢利為4.15億元，按年增幅11.8%，現價市盈率21倍，最吸引係息率有4%，過去一個月佢由20元水平開始爆上，差不多有成10%進帳。由於燃油成本佔佢生意一大開支，油價跌了差唔多大半年，唔排除係炒中期業績。呢個升幅在快牛市時當然無料到，但係個市CHOK到人人自危下，佢就相當難得啦。
後記︰陸羽仁新書《順勢•逆勢》出版，有簽名書在書展發售，地點是泛華發行的書展攤位1B-A16(綜合書刊館)，歡迎到場選購。
沒有留言:
張貼留言