睇手勢阿爺都好急吓，早前搞到個股市回一回減吓壓，就急急出手，都唔等過完年就郁手，而放水就特別針對小企和農業，預計農業股有較多炒作。
內地上證綜指昨回番1%左右，收3174點，今次降準，又畀子彈個市炒吓，再挑戰高位3400關。
昨日美股反彈，令港股高開，不過市場氣氛唔算太熾烈，市場焦點反而落喺幾隻消息股之上。恒生銀行(011)透露不排除出售持有的興業銀行10.9%股權，市場反應受落，股價彈高半成，呢個消息說明咗金融資產有價，帶來了尋寶概念。
最近市場關於金融資產交易的消息有幾單，而且都唔係碎料。最快公佈係新鴻基公司(086)出售屬下證券業務權益，作價41億，仲傳緊有中銀香港(2388)出售南洋商業銀行同呢單恒生出售興業銀行，海外則有傳渣打(2888)出售不同地區的業務，近排好弱的渣打亦大升5%。
內地執嘢 銀行套現
市場咁多併購消息，陸羽仁認為主要有兩個催化劑，一個係內地經濟升級轉型，金融係重要領域，在擴展之餘仲要配合國策走出去，令到市場多咗個大買家。
另一個誘因係國際不斷收緊金融機構監管，包括提高對資本的要求，令到不少銀行有融資需要，假如這些機構唔想向股東伸手，出售資產就變成另一途徑，用呢個方法最大好處係唔使麻煩股東，甚至可以產生特殊盈利，變成好消息，管理層唔使因為抽水頭痛，隨時仲因為盈利高咗有花紅分。
市場成交最需要有買家、有賣家，現時襄王有夢神女又有心，自然好多消息傳出。
在如此市況下，股民應對有兩個方法，一個係追風逐浪，聽消息去炒，呢個係高風險、專業嘅玩法；一個係守株待兔，買入資產有價、股價偏低的股票，希望有人青睞佢時可以收割食胡，呢個方法笨小小，勝在風險低。好似恒生銀行，過去幾年股價呆呆吓，但勝在有息收，突然之間話賣產，股價湧上新高，咁小股東咪財息兼收囉。
有中環茶友係恒生客戶，佢話銀行專欺熟客，利息特低，佢後來做存戶外仲做埋股東，一於自己賺番自己錢，今次股價炒上，佢就得米！?家下個目標係中銀香港，如果佢股價下跌，就會諗諗佢喎。佢現價13倍PE，3.7厘息，但近排升得較多，等佢回番少少入貨，都有啲值博率。
美林估恒生大派特別息
另外對於今次恒生賣產傳聞，摩根大通發表報告，認為若交易落實，料對恒生股價有正面作用，維持「增持」及目標價146元不變。報告仲比較咗市場傳聞中銀香港出售南洋商業銀行的交易，摩通認為恒生悉售興業銀行股權的傳言更為有理，因恒生僅持有少數股權，未來將會進一步消耗其資本比率。該行估算若恒生悉售興業銀行股權，料未來對股本回報率(ROE)影響僅低於1%。美銀美林發表報告指，初步計算，預料恒生若成功賣股可派特別息每股12元。
由於匯控(005)持有恒生62%股權，一旦派特別息，匯控將成為主要受惠者。
雖然有恒生呢單消息，港股全日表現都只係反覆，恒生指數今早曾升270點，惟國企指數倒跌，令恒指尾市升勢放緩，全日僅收報24679點，升124點；國企指數收報11767點，跌1點，成交金額873億元。
沒有留言:
張貼留言