內地A股今個星期幾唔靚仔，雖然發改委宣佈成立1800億元人民幣的新興產業投資基金，但在周五內地期指結算前，淡友繼續無面畀，收市深成指數跌咗5%，滬綜指數都跌3.5%，搞到恒生指數收報21455點，跌咗106點收市，跌幅0.5%，其中地產股特別腳軟，龍頭新地(016)插咗3.3%，守住紅底報100.4元，恒地(012)報48.15元，跌2.2%。
美市睇債 港市睇樓
地產股跌得多個大市，相信係投資者喺周五聯儲局開會前避險意識增加，唔買息口敏感類別的股票，搞到地產股「騰」定先。
經濟差，政府特別難做。消息傳來，澳洲發生「逼宮」事件，總理阿博特被黨內二號人物特恩布爾狙擊，失去黨魁地位，咁代表佢連總理都無得做。阿博特今次丟官，主要理由同上任一樣，就係「經濟衰」。在國家領導層換人之際，澳洲央行公開文件透露，澳洲經濟依家好似大海上嘅小船，身不由己，既要睇中國經濟，又要睇美息。
澳洲央行坦言，內地前景未明朗，下行風險持續，大有食粥食飯，要睇聯儲局九月會議係咪手下留情嘞。
美國是否加息，成為今星期投資者落注的最大考慮。不少分析家指出，美息動向與股市無必然關係，今次若然美息向上，首要睇實債市表現。由於美息過去九年長期處於極為偏低水平，令債息處於不合理低位多時，一旦美息向上，意味美債有可能大幅下調。
美元美息觸動市場神經，新興市場已經聞到燶味。金磚四國成員之一的巴西，今年備受匯價急跌、通脹爆升之苦，主權評級備受質疑。國內巨企紛受債務危機威脅，好似巴西國家石油公司的信貸評級遭標準普爾降至垃圾級之後，公司於6月發行的總額25億美元100年期債券，大幅跌價15%，孳息從發債之初的6.85厘，飆升至9.86厘，令持有該債券最多的三大外資PIMCO、富達和Captial措手不及，所以如果美息向上，債市最大可能成為大炸彈。
美國睇債市，香港就睇樓市。自從A股爆破後，港樓出現新強舊弱的狀況，發展商推出的新盤仍然賣得，但二手樓就出現冰封冷凍嘅現象。過去樓市以二手市場主導，有八成交易係二手樓買賣，但自從政府推出雙辣招，扭曲市場狀況，由於發展商可以用不同手法包裝新盤，補貼買家支付辣招稅，搶走二手客源，令新盤成交比例逐漸增加。
港府有心踩多腳
喺雙辣稅變相幫發展商賣樓下，每逢樓市購買力減弱，首先受影響會係二手樓。過去兩年發展商逐步減低新盤同二手樓之間嘅溢價，即係新盤同二手樓價錢愈來愈接近，當市況好時，二手樓仲可以頂得住，甚至創出天價癲價，但當市況逆轉，二手樓業主就第一個頂住迎來的巨浪，衝擊過後仲有無褲着，就要睇條褲綁得實唔實啦。
由於香港債市細小，市民多數係買磚頭，作為儲存財富的工具，所以香港樓市同美國債市一樣，影響經濟比股市仲要明顯，呢排二手樓市交投大跌，加上租金回落，就有啲似美息咁牛皮待變格局，地產股就率先腳軟，股價「騰騰哋」，呢排跌完都唔見有明顯反彈。有中環茶友形容，美債同港樓都係玩緊「晒冷」遊戲，兩者都可以話係位高勢危，同時又博中央銀行唔敢郁佢，因為一郁佢隨時搞出衰退，唔同嘅係美債有聯儲局睇住，港樓就要跟住美國走，而且政府仲想一腳踩低佢。
沒有留言:
張貼留言