美股回調，又係炒番下周美國聯儲局議息，而到香港時段內地公佈上月CPI通脹率2%，比市場預期高，約束放水空間，8月工業生產價格指數(PPI)連續第42個月下滑，按年下跌5.9%，創六年新低，跌幅多於市場預期的5.6%，消息利淡，投資者借勢獲利。
無量寬不打貨幣戰
依家港股基本上無特別本地因素炒作，主要都係睇住中港兩地消息。內地消息最出人意表係八月份內地突然擴大人民幣波幅，市場擔心貶值未完，造成全球股市動盪。呢個反應相信有少少出乎內地領導人估計，之後內地官員紛紛開腔，強調人仔無意長期貶值。
國務院總理李克強於夏季達沃斯論壇致辭時話，單靠量化寬鬆放水無法解決結構化問題，中國絕不主張打貨幣戰(股民反而好想有量寬)。
他表明，中國還將繼續保持匯率在合理均衡水準的基本穩定，將穩步實現人民幣資本項目可兌換。
從領導人一番話，至少在主觀意願上，內地不想令人民幣顯著向下。唔知係唔係配合領導人講嘢，離岸人民幣兌美元昨日急速拉升，截至昨日下午5時，暴漲逾700點，漲幅擴大至1.1%，創出近一個月新高，與此同時成交量大增，懷疑阿爺在離岸市場干預，令離岸人民幣匯價和在岸價差價大幅收窄。由於A股已經下調咁多，逐步反映人民幣貶值壓力的影響，慢慢相信來自中國的震盪期暫時過去，情況可以穩定下來。
但另一半問題即美息動向，現在仍然難測，市場對加或唔加傾向相近，暫時相信九月唔加的傾向較高。如果9月唔加息，同埋聯儲局主席耶倫對未來表現又講得比較審慎，咁個市就有可能有個反彈期。若然加息個市會比較窒。最緊要睇實在開會之前，美國個市有無偷步大升，如果個市已經彈得好高，咁就算唔加息都作用有限啦。反而插插吓的話，到見到唔加息就會好啲。基本預測係大市慢慢進入穩定期，最好見低先去買。
跟買中車 唔平咪制
市場無乜重大消息下，恒生指數昨日收報21562點，跌568點；國企指數收報9780點，跌195點，成交縮至795億元。跌市中基建鐵路股逆升，中車(1766)獲曾傳是「股神」巴菲特接班人的李祿旗下對沖基金喜馬拉雅資再買入2323萬股，持股超過5%，中車全日收造9.67元，升5%；中車旗下南車時代電氣(3898)升1.6%，報54.7元。
中車今年真係見盡起落，佢合併後由9元起步，幾個月間爆升一倍，市值成為全球同類型公司中最大，結果升得快、爆得快，喺6月份個市未暴跌，佢已經插咗落嚟，依家睇番當時已經係凶兆。現時中車重回起步點，仲有李祿走嚟買吓，本來都係好事，但由於佢蟹貨重重，想跟進者最好都係等呢輪興奮過後，插低時先至好郁手。
股市不穩，但地產商照開新盤，鎖定利潤。新地(016)昨日公佈截至6月底止全年業績，揭開地產股業績序幕。集團期內撇除投資物業公平值變動的影響後，可撥歸公司股東基礎溢利為198.25億元，同比跌7.4%。期內物業銷售收益為217.04億元，為集團帶來73.32億元溢利，同比少30.2%。租金收入方面，淨租金收入升8%至153.52億元。估計佢未來租金收入有啲壓力。
新地曾有段時間減少買地，但近幾個月又勇番啲。集團基本上已經係香港地產同股市的座標，股價上落受大圍市道影響，多過個別年度生意做得好唔好。
沒有留言:
張貼留言