早兩日陸羽仁話過，跌市理由多，呢個說法繼續有效。美股創新高後持續調整，港股美國預託證券已經腳軟軟，跟住國務院總理李克強宣讀工作報告，指數再度向下，一度下跌近三百點。市場之前炒兩會政策，當消息成真後就玩完，有炒家就借中國明年經濟增長目標只有7%為由，質低個市。
增長目標惹沽售
內地定出今年經濟增長目標7%左右，增長目標是2004年以來最低。克強總理坦言，今年中國經濟下調壓力增加，7%的增長目標已是符合客觀實際。市場認為，內地進一步下調經濟增長目標，意味今年不會有強刺激政策出台，乘機沽貨。我就唔係咁睇，你估7%好易做到？阿爺無計，被逼放水。
內地處於換檔期，好多分析家都唔只係完全睇增長率，同時要睇增長質素，畢竟中國已經成為全球第二大經濟體，基數咁大，7%的增長絕對值已非常驚人。美國衰咗咁多年後叫做有復甦，但暫時估計增長率同內地仲相差一截，日本雖然貨幣瘋狂貶值，叫做暫時頂住通縮威脅，增長同中國仲係無得比，所以無論目標訂係7%，抑或高一啲嘅7.1%、7.2%，分別基本上唔大，有分析話若然能達標，7%已經唔錯，關鍵反而係做唔做得到啫。
內地近日個市唔係咁起勁，陸羽仁認為同中央意願脫唔到關係。去年中央減息觸發股市狂升，好快就出現泡沫化趨勢，咁搞法情況隨時失控，到時就仲大件事，故此阿爺急急出手，壓住融資炒股。今次再減息，阿爺同樣睇住個市走向，明顯係唔想個市升得太急。
股市唔係升降機，唔可以股民想去幾高就幾高，有形之手唔想個市升得急，咁佢就可能要跌下，要跌到咁上下先反彈，要去番3100、3200點水平左右打底都唔過份。我覺得回深少少可以開始吸吓貨。
人仔偏軟推低航空股
有中環茶友話，除咗北京政策因素，仲有一樣不能忽視嘅，就係其他國家貨幣政策。因為自從歐洲跟隨日本印銀紙救經濟後，大、小國家三朝兩日就減息放水，令到中國不斷受壓，人民幣有貶值抗衡壓力，就算阿爺唔想大貶，但減息之下，匯價軟軟吓無可避免，呢樣嘢都影響外資購買中國資產的興趣，對中港股市有利淡影響。受到匯價因素影響，本來春節前後炒一轉的航空股反見沽壓，國航(753)成為表現最曳國企指數成份股，跌近4%；南方航空(1055)、東方航空(670)同樣被質。
恒生指數收報24193點，跌272點；國企指數收報11597點，跌140點，成交有成921億元。市場焦點都仲係幾隻潔淨能源股，交投最勁的漢能薄膜(566)，最高爆上9.07元，市值超過3000億元，收市升幅大為收窄，報7.3元，都升咗14%，成交44億元，高位9元搶入已中重錘。漢能每股淨值只有0.552元，息率0.21厘，從投資角度根本買唔落手，成隻股變成一架投機過山車，上上落落，膽汁少啲都唔掂，呢架千億過山車唔易坐。除咗漢能外，其他同概念股好似君陽太陽能(397)昨日勁升七成，交投都有5億元。
近日市場集中炒賣個別股票，自從鱷魚恤(122)有人斟盤股價急升，呢排幾隻冷門資產股好似開達(180)咁都見到交投增加，呢類冷門股三年唔發市，發市當三年，總之正路股無乜好炒，大家就敲冷過日子！
沒有留言:
張貼留言