其實港股受內地股市牽引，內地「鈍化」反應更明顯，滬市昨日高開後一度倒跌，曾穿3300點。後來趕住走的沽盤清得七七八八後，內地股市止跌回升，上證指數收報3336點，漲25點；深成指收報11884點，漲126點。兩市成交7978億元人民幣。
太陽能電動車食住上
內地午市升幅擴大，主要係炒作兩會因素，資金都係追捧政策股，輪到環保股板塊表現突出，帶動埋港股的中集安瑞科(3899)升11%，是港股通表現最好的股份。信義玻璃(868)去年少賺六成，股價照升10%，是港股通升幅第二大股份。另外，中國燃氣(384)升9%，升幅排第三位。
前中央台主播柴靜搞了條片《穹頂之下》講中國霧霾問題，在內地惹起好大迴響，條片無禁，而新任環保部部長陳吉寧仲話睇過條片，仲發咗短訊畀柴靜以示支持。柴靜話自費100萬拍呢條片為公益，呢個講法陸羽仁信住一半先，柴靜同上任溫總理都幾熟，新總理李克強上任兩年亦都未搞掂霧霾，在兩會前走條咁樣的片出來，都幾贈興，唔理件事有無背景，克強總理受壓，環境勢成兩會主題。
既然兩會會重視環保，換個投資角度，環保股、新能源、電動車股又有得炒。大股如電動車股比亞迪(1211)升4.4%，太陽能股保利協鑫(3800)升5.4%，都唔係無炒作理由。
地產股當無到跌唔落
恒生指數收報24887點，升64點或0.26%；國企指數收報12213點，升27點或0.23%，成交金額797億元。長和重組首關通過，長實(001)昨日懶理金管局辣招，股價大升2.9元，升1.9%，創156.4元新高，氣勢一時無兩，乖仔和黃(013)就收升1.1元，升1%，收報107.3元。金管局加辣打樓市，地產股窒咗一窒，剛過去的周末及周日二手樓冰封，地產代理美聯(1200)早段挫逾2%，本來農曆新年過後係二手樓市傳統旺季，3、4月會有小陽春，政府呢個時候出手，唔多唔少係想趕在小陽春前出招，但美聯股價相對唔算跌得多。
中環茶友話，自從政府出咗辣招，買家置業首選係新樓，?家再收緊按揭，出三成首期基本上無辦法買到二手樓，可以提供二按解辣的新盤必然進一步搶走客源，本來地產代理以二手樓為主，但近年幾家大行積極轉型，加強一手樓促銷，?家發展商賣樓，都要靠代理拉客，新盤數量增多，賣樓難度增加，幾家龍頭代理行不愁沒有生意，所以喺辣招之下，美聯股價唔係跌咁多，就係呢個原因。
大昌行業績一葉知秋
地產股更跌得少，長實唔講，新地(016)跌0.4%；信置跌(083)跌1%；恒地(012)仲要升0.1%！市場當政府無到，好似估一手賣樓唔受影響。我就無咁樂觀，二手死晒，點都影響大市氣氛啩。我繼續認為地產股少掂為妙。大昌行集團(1828)公佈去年業績，純利7.5億元，按年減少16.8%，派末期息6.6仙，比去年末期息10.72仙大減近四成，公佈後股價即跌9.5%。
一葉知秋，大昌行主要業務基地係香港同中國，去年本地生意幾唔錯，但受到內地市場放緩，純利難逃一跌，而且因為負債上升，公司要減少派息。另外，集團喺內地的食品及禮品業務，都受到大環境影響導致營業額增長放緩。大昌行倒退一成幾利潤，已經算係唔錯，可以估計其他食中國水的公司，盈利難免受影響，大家睇路啦。
沒有留言:
張貼留言