恒指回升近三百點，有中環茶友好茫然咁問?家應該點？陸羽仁有點不明白，就話如此市況，當然係順勢短炒，咁仲有乜好問呢？茶友就面露愁容話：我唔知買乜喎，因為個市雖然係升，但係我買啲股跌多過升，咁究竟應該買邊啲股先得呢？
A股衝高須防回調
睇番茶友買啲股，部份係港企，部份係能源股，自然無運行。我同佢講，能源股好似三桶油，呢排受國際油價下跌拖累，到佢跌定時至係大手吸納食大茶飯機會，但記住係「跌定時」，?家就莫買當頭跌，唔好咁快入貨。現時分析油價大跌因素，不出兩個主流睇法，一個係石油出口國組織推低油價，想整死生產成本較貴的頁岩油開發公司；另一個係美國推低油價，圍堵俄羅斯。兩個原因無論邊個啱，暫時都未見到有足以改變油價方向的新局面出現，好似話頁岩油商倒閉，又或者俄國讓步等。所以油價回升，可能只係反彈而唔係見底，咁樣石油股都仲未低至大手低撈時刻。穩陣方法係繼續觀望，睇睇油價係咪真係成功尋底先落注。
國企炒上，但未到雞犬皆升的地步，至今為止升得最多都係金融類股票，包括內銀、內險同證券商股，如果你無買呢幾類股票，咁就未必可以有得益。我笑茶友，話你梗係無聽我講，因為如果有聽我講，見低位買啲內銀股，等多陣見佢回升破位又沽吓貨，趁佢回調又買番，呢兩個月收穫應該都幾和味。內地A股昨日反覆，低調後衝高收市，但有近三百隻股跌停板，創業板都有明顯調整，要小心指數衝高後有機會落番。
內銀股年尾發威，四大內銀成為升市火車頭，昨日合共推升恒指139點。此外，招行(3968)大漲近8%，跑贏一眾國指成份股。睇番數字?家好多內銀股仲係中單位數的市盈率，好似龍頭股工行(1398)，市盈率不足6倍，息率有6厘，計起就未為貴。
工行由今年低位4.33元升上來，累升咗接近三成，幅度聽落好多，從市盈率數字上睇則仍然唔算貴，順勢短炒的話，可以見佢升到破位就沽一沽，調整咗升幅一半又入番貨，就住個浪出出入入。如果股民無買，就少咗個喺升浪賺錢的機會。如果內地A股繼續造好，呢招睇位短炒可能未來幾個月仲係繼續得。
由於內地A股表現反覆，港股接近中午升幅收窄，午後重拾升勢，最高升過362點。恒指收報23408點，升291點；國企指數收報11744點，升343點，成交上番1010億元。內險、電力股都表現唔錯。藍籌股中，騰訊(700)報113元，跌2.3%，反映佢有唔少回吐壓力。
濠賭股H股相反走
新地(016)聯席主席郭炳江罪成辭任，另一聯席主席郭炳聯則脫罪，該股復牌造好，收115.8元，漲逾2%。大型內房萬達商業(3699)掛牌前暗盤變動不大，較招股價48元低0.1元，真正表現要看今日掛牌至見真章。
國家主席習近平訪問完澳門，一如陸羽仁預期無大禮送，濠賭股逆市再跌過，金沙中國(1928)跌2.6%，為表現最差藍籌；銀河娛樂(027)跌2.2%。習大大唔喜歡澳門「漏水」，太多中國錢輸出去，未來都係打壓多，濠賭股和H股走勢相反，可以見反彈減持。
沒有留言:
張貼留言