上周股市上落好大，主要受油價暴跌和聯儲局議息牽引。聯儲局議息後外圍股市大力反彈，杜指上周五再升26點，收報17804點，高位企穩，以全周計，杜指大升3%。可見聯儲局一句對加息要有「耐性」，真係對市場有好大安撫作用。
紐約油價上周四創五年半收市新低後，至上周五大幅反彈，投資者在1月紐約期油合約結算前補淡倉，紐約1月期油價上周五收市升2.41美元，升幅4.5%，每桶報56.52美元；俄羅斯盧布受油價反彈帶動，加上俄羅斯財政部長西盧阿諾夫證實已干預匯市，盧布匯價上周五回升，收報1美元兌59.6盧布，升3.3%。與上周的紀錄低位比較，盧布已回升兩成半。
油價未跌完莫心急
油價下跌雖有石油輸出國組織夾美國油商的因素，但最關鍵的還是美國借此攻擊俄羅斯，俄羅斯66%的出口與油氣直接有關，俄國財政預算要油價在100美元以上才無赤字，油價由6月高位107美元咁跌落嚟，真係命都無。
俄國新沙皇普京受咗傷還擊，上周四開記者會，話預咗油價要跌兩年，即係畀定心理準備大家，佢可以長期作戰，又話會力挺盧布匯價。普京在記者會上又透露離婚後有新戀情，當大家覺得佢九唔搭八，在國家水深火熱時還談戀愛，其實新沙皇係扮鎮定，話「我好老定照拍拖」。普京同時出招，邀請北韓領袖金正恩訪問俄羅斯，這將會是金正恩上任後首次外訪，實行在美國最痛的地方灑鹽。美國總統奧巴馬就繼續出招，簽署就烏克蘭問題對俄羅斯制裁的命令。
我覺得油價急跌將造就投資的黃金機會，如你不是博短線反彈，而係想搵個近底位作中線投資，就唔好太急，因為油價未跌完，反彈後仲要再尋底。我覺得普京用軍事力量支持烏克蘭克里米亞獨立，大犯美國之忌，美國不想出兵介入，所以要用低油價玩死普京，一係迫到俄國政變，一係逼到普京在烏克蘭問題上讓步才收手，如今油價急跌咗三個月，跌幅唔夠深，時間唔夠長，起碼都要跌半年，大力放俄國血才成。
好多人擔心油價急跌俄國唔掂，會重演1998年一幕，令美國也爆出金融風波。當日俄國債務違約，美國一個大對沖基金「長期資本」做了大量俄國債券的衍生工具合約，俄國一身債，「長期資本」就爆煲；由於好多美國銀行借了錢給長期資本，美國要救，聯儲局主席格林斯潘大力減息救市。順帶提一句，強人普京都係利用經濟危機，在2000年上台，收拾俄國的經濟殘局。
若這一趟油價爆煲由美國做金像大導演，佢當然做好防備工事。奧巴馬一早搵咗聯儲局主席耶倫，令聯儲局對明年加息的態度軟化，才搞出對加息要有「耐性」這個新名詞。所以我估油價續跌，美國金融系統會無事，美國消費者大歎平油，把俄國這隻北極熊放上架慢火烤，弄不好這還是美國執政民主黨的連任大計，低油價令消費好景，有助民主黨換人再執政，咁支持共和黨的油商自然辛苦啲啦。
中國真係有運，油價低不但有利中國經濟，美國要打俄國又要打伊斯蘭國，唔得閒打中國，對香港問題都好低調，中國唔借呢一兩年空間大力發展經濟，就相當老襯啦。
比亞迪彈完仲要捱
唔好覺得呢啲大事同自己無關，單係一樣油價，都影響自己荷包。油價唔得，新能源股、電動車股都唔掂。比亞迪(1211)係咁急插有呢個底因，雖然短炒入位準真係可以博到一兩成，但唔好睇得太盡，以為前景一片光明。
美國電動車股王Tesla股價在9月升至上市高位的286.04美元後反覆回落，上周二曾跌至197.81美元的逾半年低位，較高位下跌三成，後來反彈，上周五收219.29美元，比低位反彈了10.8%，但仍比高位跌了23.2%。如果呢場油價風暴演得愈激烈，呢隻電動車股王比高位跌50%都唔出奇(唔好忘記佢由50幾美元升上來)，咁就要見143美元。所以比亞迪都一樣，小心彈完要再尋底。
今年新股王大連萬達商業地產(3699)將於本周二在港上市，甚受注目。佢上市前其他內房股都無炒起。早前萬達非執行董事王貴亞表示，今年集團核心盈利(扣除投資物業增值部份)為143億元人民幣，按年升10%，按萬達今年每股盈利不少於6.79元計算，是次上市市盈率為6.16至7.3倍(以定價計是7倍)。他又指萬達有意拓展海外法治健全的成熟市場。我就話內地地產股股王萬科(2202)都係7倍市盈率，所以萬達開呢啲價真係差不多，但佢認購情況咁好，主要賣佢大老闆王健林概念。
萬達大玩其他概念
王健林上周六現身武漢市，佢話萬達集團已連續9年實現了30%左右的年增長，今年以前萬達主要收入來自房地產，但認為內地房地產業務的高速發展時間已經結束，所以要全新轉型，發展文化、旅遊、金融及電商4個產業，海外最感興趣的是旅遊、娛樂及傳媒行業進行的併購，又話會在下月中旬會公佈整個轉型大計。
近幾年萬達在文化旅遊產業方面大力發展，在武漢、哈爾濱、西雙版納、廣州、南昌等地也在積極進行文化旅遊項目開發，未來萬達將建造多座室內外的主題樂園，如電影科技樂園、室內滑雪館、水上樂園、海洋館、兒童樂園等。
王健林話，文化產業分拆上市是必然的，集團很多重要的新公司譬如主題娛樂公司等，都是在香港註冊，若未來發展得好，或可能在香港上市。
由於即將上市的萬達商業主攻內地地產項目，發展文化產業及旅遊產業的是母公司萬達集團，和香港上市的萬達商業無必然關係。王健林如此自貶房地產業的身價，有點耐人尋味。據投資界人士話，萬達商業市盈率唔貴，但單睇地產業難大升。萬達集團發展其他行業，未知會否和萬達商業合作，大家落少少注，睇吓未來有咩消息可以炒囉。
文化旅遊大有可為
王健林在港名頭不響，但他曾是中國首富，最近才被馬雲超越。王健林與馬雲於2012年底就「2020年網購銷售額會否超過零售總額一半」對賭1億元，廣為人知。過去兩年網購發展迅速，令馬雲暫時領先，阿里巴巴集團9月中於美國上市後，馬雲的身家更超越王健林成為中國首富，但王健林仲排第二，係猛人一名。
我哋買股都可跟吓猛人貼士，王健林話文化、旅遊、金融及電商四個產業，都可以留意。有內地大公司搞呢啲產業，特別係新股，可以跟吓，呢啲都係未來重點。至於萬達，若然唔係升得太癲，有股可以揸吓，細細注跟吓，看看王健林有無後着都好。
沒有留言:
張貼留言