呢次回升，唔多唔少有跟全球股市沽得太多炒反彈的味道，所以首先係沽空得多的股份要回補，其次係好友偷步炒美國議息結果。炒股之道，唔驚好消息、唔驚壞消息，最驚唔明朗。美國就快議息，無論加唔加息，都會有個結果，屆時至少有一段短暫穩定期，等個市作出反應，現在全球熱錢充斥，早前環球股市插得深，人人都想偷步博一轉反彈，如果等佢有結果先郁手，肯定會慢咗，結果就大家鬥偷步。?家聯儲局興放氣球測水溫，隨時開會前一兩日已有風聲，連聯儲局都咁搞，你話炒友點可以慢，所以話呢次爆升有偷步味道都唔奇。
阿爺搞到升勢幾「健康」
港股兩日回升千幾點，後市如何，陸羽仁唔會見好唱好，一個好大嘅因素係美息去向未定。早前大跌其一係跌內地人仔貶值，其二係跌美息，但人仔貶值第一波應該止咗血，第二波可能要到明年才再玩，所以短期計內地因素見咗個小底。大市穩咗一半，另一半睇美息。
但美息加好抑或唔加好，可以有唔同睇法，部份商界大孖沙?家反而覺得，長痛不如短痛，如果今次美國加咗息仲好，因為美國?家情況，根本頂唔到高息，早啲加咗，今年最多再加一次，等美息慢慢去番正常少少水平，反而商業環境無咁不明朗，好過?家成日窒窒吓。但股神巴菲特似唔係咁同意加息，認為歐洲息低，美國未諗清楚未來係點時，不宜太急行動。我只從炒股角度出發，若然環球股市在聯儲局加息前已大力反彈，咁你偷步炒利息唔加就要手快，否則到聯儲局議息後，若然消息唔係咁好，小心個市會回。不過以短期而言，大市應該還是會反覆向上。
中港股市連續兩日急彈就夾死淡倉，專升大股亦有夾倉或平空倉的味道。在上海國資改革、3D打印、國產軟件板塊的帶領下，滬指漲幅一度達2.7%，隨後漲幅稍為收窄，上證指數重上3200關收市，全日收報3243點，升72點；深成指數收報10620點，升299點。
港股彈幅都唔失禮，大市一度狂升逾九百點，觸及二十天線(22167)，尾市升勢略收斂。恒生指數收報22131點，再急彈872點或4.1%；國企指數收報9975點，升496點或5.23%，成交金額由昨日的827億元，增加至1154億元。呢次反彈大股升得多過二、三線，二、三線又多過炒股，升勢咁「健康」，炒開中小股的散戶固然大歎升市受惠不多，亦可能顯示大市仍然熱度不足，無人炒股。
長和系最搶鏡
藍籌股最搶眼當然係長和系。長建(1038)提出合併電能(006)，日前話佢會合併的瑞信發表研究報告指，方案對長建是有利，因最近資產負債表比較緊張，與電能合併後，將可壯大資產負債表，未來投資可更靈活。不過，對於電能股東，瑞信認為因收購價並沒有一個可觀溢價，同時因公司手持大量現金，預期股東會更期待一個更大額的特別股息。瑞信又話，目前合併方案正待股東批准，不過即使不通過，長建因其過去併購增長，故仍為行業首選。不過，睇番長江同和黃合併，股東都會考慮到若然合併不成，股價會回調，所以係咪會咁易否決方案呢？
花旗就發表報告，指交易完成後，長和持有長江基建股權由75.67%降至49.19%，長建向股東派5元特別息，料長和可獲股息達95億元。預期長和獲得股息後，該股淨負價率會進一步下降，估計集團會整合歐洲電訊業市場，但集團未來挑戰包括匯率及油價變動，花旗維持長和「買入」評級。
由於市場對合併反應不俗，加上撞正升市，長和系股價造好，長建收報69.5元，升逾4%；電能實業(006)則升6%，造71.55元；長和(001)勁彈6%，報109.9元，是表現最佳藍籌股；長實地產(1113)漲2.7%，報56.5元。
沒有留言:
張貼留言