美股上日大跌，主要係美國公佈12月份耐用品定單減少，遠差過市場預期，核心資本設備定單同告下跌。
由於數據咁弱，市場擔心企業無意欲投資，影響復甦步伐。同時，幾間大藍籌公佈業績，微軟、卡特彼勒、杜邦等多間巨企業績表現都唔得，做推土等機械的卡特彼勒股價大跌7.2%，公司明言油價下調反映全球經濟不振，預計今年市道仍差。美元大升，就係美國企業收入轉差的大背景。衞生用品商寶潔(Procter & Gamble)亦表示，由於美元大升，令到海外利潤大減，下調盈利預期，增加咗投資者對美企營運表現以至實體經濟狀況的憂慮，使市場情緒大受打擊。
美元強不利跨國巨企
從呢堆理由可以見到，美股下跌雖然唔係直接同最近歐洲放水有關，但反映了去年起歐洲通縮、美元轉強對跨國公司的影響，相關因素仲未反映新一輪的主要貨幣貶值潮的影響，所以有人擔心若美國繼續收緊銀根推高美元，最終會削弱以國際業務為主的跨國公司生意。
另外，有人亦估計，由於聯儲局將公佈議息結果，跌市可能係預期儲局會進一步流露加息意圖，令到華爾街投資者先行沽貨避避風頭，從呢個角度講，若然美國擔心強美元影響經濟，反而可能會拖慢加息，咁唔算係壞事。
至於點解港股無跟美股下跌咁叻仔，陰謀論解釋係大戶想托住期指結算，睇番個市升咗咁多，如果期指係呢個位結算，好友都已經有唔錯斬獲啦！有中環茶友就話，美元咁強，唔多唔少影響企業競爭力，咁可能增加了聯儲局加息的顧慮，可能因為加息預期降溫，所以呢幾日利率敏感的公用股同房託表現普遍唔錯，再加埋中資電訊股，就托住指數跌唔落。
A股繼續去槓桿化
內地傳媒證實光大銀行(6818)下周起明確調低傘形信託配資槓桿，最高限定為1︰2.5。分析人士認為，此前銀監會發佈相關規定後，市場對銀行體系流入股市的資金問題已經有所警覺。此次光大調整政策是導火線，相信減低槓桿的做法持續，A股資金供應會受到影響，有可能要繼續消化一陣，等去槓桿效應消散。在消息影響下，A股下調接近1%，內銀同內險股都有啲壓力。但瑞信就話睇好內銀股前景，料今年行業將進一步重估，內銀股全日個別發展。信行(998)公佈去年純利407億元人民幣，按年增3.9%，被指業績比預期弱，大行摩通維持「減持」評級，收報5.83元，跌0.2%。
內地股市現處鞏固階段，加上市場注視今晚聯儲局議息同期指結算，令市場觀望氣氛濃。恒生指數收報24861點，升54點；國企指數收報11963點，跌66點，成交縮至804億元。中信證券(6030)去年淨利潤為112.95億元，按年大升1.15倍，股價應聲造好，收報25.45元，升2%，是國指升幅最大成份股。中國中藥(570)收購中藥配方顆粒製造商江陰天江藥業81.5%股權，瑞信讚作價吸引，股價急升10.7%。
摩根大通重申「增持」信義光能(968)，因EPC項目比預期強勁，但下調目標價由3.8元降至3元，股價午後發力，收報2.16元，飆5.9%。大市未有動力向上，陷入炒個股的局面。
沒有留言:
張貼留言