人仔腳軟拖低內險
人民銀行昨日再進行逆回購操作放水600億元人民幣，不過滬市積累回吐壓力，不升反跌，低收3352點，跌30點；深成指收報11551點，跌135點。人民幣兌美元連續兩日下跌，觸發銀行板塊午後一度跌逾4%，收跌2.6%，叫做跌少咗；滬市曾穿3300點，導致證券商及內險股跳水，證券商股最多跌3%，尾市跌幅收窄至1.5%，內險最多跌4%，收市跌1.5%。
自從因為監管部門查處證券商融資炒股操作後，市場開始意識到中央希望股市上升，但又唔希望佢升得太快的「上意」，A股在大跌後急彈。但經歷過幾日升市後，指數開始貼近高位，呢個時候大家知道唔想惹起阿爺出手，最好都係唔好咁猴急，寧願做吓慢牛。正路推算，個市應該唔會咁快衝破今年高位啩，最好係先反覆一輪，唞夠先再開步，咁就最合阿爺心意，可以玩得長啲。放水個市都唔係咁癲，阿爺就可以放心去開水喉啦。
內地股市雖然年初即來一次大震盪，但美資大行就繼續睇好。高盛中國首席策略分析師劉勁津認為，中央推行改革、放寬貨幣政策，以及市場資產重新配置，都利好內地股市前景。
他指出，每當人民銀行減息一次，有助推動內地A股估值上調20%，估計上半年人行將減息一次，及下調存款準備金率兩次，最快春節前後放寬貨幣政策。所以短期A股仍有調整空間，而全年滬深300指數可望升至3800點，較現時有6%至8%的升幅。
受內地股市急跌影響，港股午後更一度挫達237點，尾市守住24800上。恒指收報24807點，跌102點；國企指數收報12030點，跌197點，瑞信指長城汽車(2333)上季純利創新高，股價飆5%，造44.8元，為表現最勁國指成份股。
濠賭股還在反彈市之中。花旗表示，按最新賭業數據推算，預期澳門博彩收入可達240億澳門元，比原先估計的230億澳門元佳，濠賭股回升，二線賭業股升勢凌厲，海王(070)抽升26%，造0.146元；澳門勵駿(1680)抽升25%，報3.16元；連帶澳門最大飲食集團佳景(703)都炒高14%。
大、小濠賭股炒番轉好好睇睇，最大理由唔係花旗所講博彩收入好，而係跌得多、彈得勁嘅股市物理現象。由於距離農曆年仲有成三個星期，咁快大家已經炒定反彈，偷步偷得咁快，最驚係炒得快時散水都快喎！
半新股繼續落鑊
近排興失驚無神炒作半新股，迪臣建設(8268)一日大升20%，報0.73元；掛牌後炒味濃的新龍移動(1362)再炒上16%，報1.36元；BBI生命(1035)抽高9%，造2元。有大行出報告睇好神州租車(699)，預期股價有相當於17%潛在升幅，該股聞訊逆市造好，彈咗2%。野村話，神州租車為內地最大的租車公司，按車隊規模、收入和品牌認受度，比第二大同業一嗨租車規模大3至4倍，現時內地租車滲透率僅0.4%，受惠內地家庭更多本土旅行，同時愈來愈多城市推出汽車限購令下，料神州租車前景可睇高一線。
現時神州租車預測市盈率22倍，對比同業17倍高，考慮神州租車長遠可穩步增長，野村就睇好股價前景。我就話神州租車最大概念除咗係本業之外，仲有因為湊大該公司的聯想控股今年有興趣上市，或者會吸引投機炒作。
沒有留言:
張貼留言