渣打成敗都係新興市場
渣打係金融海嘯期間，可以話係逆市奇葩，歐美跨國大銀行飽受衝擊之際，佢就盈利連連上升，主要因為渣打業務集中印度等亞洲新興市場。當時金磚四國本已熱炒，美國大力放水，資金湧入新興市場，令佢生意受惠不淺。不過，自從美國開始唔放水，資金已開始回流炒美股，到美國部署退市時，資金減少更加快流出新興市場，自2011年渣打經營開始有壓力，股價在2010年上高位245元就走下坡，持有集團的維權股東開始批評管理層，股價在困擾下由強轉弱，去年下半年開始屢試低位。
渣打宣佈裁員後，正如好多節流計劃，獲得市場正面反應，昨日收報115元，升2.9%。管理層迅速行動，亦有回應股東批評的作用。渣打裁員的消息在去年底已經流傳，現時落實唔令人意外，要關注係動一次手術，係唔係能夠切除病源。呢樣嘢暫時就唔似好樂觀。
目前全球趨向係「萬佛朝宗」，流向美國，靠熱錢推動經濟的國家大部份仲要調整，加上渣打一向係美英這些傳統金融市場關係唔係特別強，不時被監管機構郁，就算股價受重組消息刺激彈一彈，可能都係沽貨而唔係入貨機會。
由於人民銀行繼續暫停公開市場操作，新一批IPO下周開始申購，A股借勢調整，金融股捱沽。
騰訊新年五連升
本來杜指大幅反彈212點，帶動恒指借勢高開239點，無奈內地股市大幅回吐，港股升勢一度大降至38點。午後大市重拾動力，恒生指數收報23835點，升154點；國企指數收報12023點，升32點，成交1019億元。騰訊(700)連升五日，收報127.3元，升2.9元，去年科技股唔好炒，騰訊已經係最叻，但都係雙頂回吐，無金融類紅色股的牛氣，證明市場資金有限，只係一個個類別咁炒，炒得內地金融，就無錢炒內地科網股。
A股調整，個別股份仲係有消息炒。內地有報道話大連自貿區申報方案已上報至國家層面。西安、武漢以及蘭州等地方，同樣積極爭取進入第三批自貿區。在港上市的大連港(2880)升差唔多7%，報收2.95元。
大連海關在去年11月，宣佈在先期試點的基礎上，將全面複製推廣上海自由貿易試驗區的14項海關監管創新舉措。
油價下跌新能源股本來唔係幾得，但呢幾日風電股炒炒哋，借住發改委下調風電上網電價加幅比市場預期低起哄。龍源電力(916)仲公佈，集團上月完成發電量按年增22%，其中風電增加近四成，股價昨日急彈近半成，可以話好耐未試過咁威！發盈喜的中國風電(182)仲急升14%。不過我對新能源股仍有戒心，怕油價未跌完，無乜大氣候長期炒佢。
沒有留言:
張貼留言