今次中港股市互動，係政治市無得估又一例子。佔領行動搞成一個爛攤子，唔知幾時先收科，可能阿爺咁拖都唔係辦法，趁特首上去見面就開綠燈，於是一二三就去馬，打隻好牌撐吓特首。
金管局總裁陳德霖仲爆響口，話與人民銀行就取消港人每人每日2萬元人民幣兌換限制，曾商談不同方案，包括提高上限至4萬或10萬元人民幣，最後決定索性取消人民幣兌換限制，認為較適合本港現況，可見無論香港抑或內地財金官員，都開放投資相當進取。
有食唔食，罪大惡極，金融機構自然第一時間殺上。中銀香港(2388)今次就醒嘞，歡迎就金融管理局公佈香港居民可進行不受限額的人民幣兌換。該行人民幣業務主管楊如海大讚，新安排有助推動香港人民幣離岸中心進一步發展，促進人民幣產品及服務更趨多元化。
中銀香港成功搶閘
該行仲公佈，由下周一客戶可以透過多元化服務渠道，包括分行、網上銀行、手機銀行及電話銀行，以人民幣(離岸)匯率進行人民幣與港幣的兌換外，亦可直接與其他外幣進行兌換，靈活便捷。此外，A股孖展服務、人民幣按揭貸款及個人貸款服務將於同日推出。反應咁快，抵佢股價彈上，成為升幅最大藍籌。由於佢估值唔貴，有貨者可以再坐一會喎。
多得金管局中午公佈香港將取消2萬人幣兌換限制，一度刺激港股直逼24000水平。恒指最終全日上升129點，報23938點。國指全日收10729點，上升0.73%、或上升77點。成交錄743.94億元，比上日減少逾兩成。
騰訊(700)為全日成交金額最多股份，涉資28.33億元。大巿拋空額75億元，佔大市成交一成，拋空股份有485隻。X安碩A50中國(2823)拋空最多達10.40億元，佔總額約13.80%及佔股份成交41.42%。盈富基金(2800)拋空額3.7億元，佔拋空總額約4.94%，佔股份成交41.85%。
中環茶友話，滬港通未宣佈前，中港兩地班財金官員都話通唔到無關佔領運動，實行「鬼掩眼」，呢着都算高招，然後死命游說阿爺，話12月搞唔掂，香港經濟大大鑊，阿爺心一軟香港側側膊咪過咗關！
官員有無咁高招就唔知，不過，從唔通變快通過程中，我哋睇到一樣嘢，係有啲有力人士真係好想呢樣嘢搞掂，點解呢？從整體利益睇，相信都因為個市有得炒。從個人利益計，相信內地財金官員都買重A股啦。
由於之前唔知幾時通，所以炒呢個概念炒到有啲窒吓窒吓，咁樣反而見光死嘅憂慮減少咗，所以個市可以係啟動前仲有力水。
大股細股唔同命
從開通前嘅市況睇，似乎大家都係睇重南水北上多啲，所以周中內地股市回一回，但香港掛牌嘅A股ETF都仲好硬淨。內地股市反覆高收，上證指數升1%，向2500大關進發，A股ETF持續造好，普遍都有相應升幅。
究竟南北水互流會，股市會有乜反應，大家都要靠估。致富證券首席經濟學家肇越，接受內地媒體訪問時就話，滬港通推出或使兩地股市出現「非對稱反應」。
肇越表示，在滬港通的啟動初期，本港及機構投資者會傾向，選擇大市值、高股息率、估值相對較低的藍籌股，對上證指數將產生一定的推動作用。而內地投資者很可能傾向於小市值、估值相對較高，尤其是存在較大資本利得空間的股票，出現非對稱反應。
沒有留言:
張貼留言