全球股市呢排牛氣湧現，不斷向上，炒慣上落市的股民難免有少少唔慣。有中環茶友話，炒嘢唔需要講理由，若然真係要搵理由，就係資金太多，炒緊嘅嘢又選擇有限。
茶友分析，上一大輪炒作潮，喺2008年金融海嘯爆發之初，當時大家驚股市爆煲，於是湧去炒石油、礦產和黃金，結果在2008年下半年炒到爆。家全球量寬格局未變，但外匯、商品喺強美元下都無乜睇頭，連債券都慢慢無得點炒，結果資金慢慢聚落股市，形成股票一浪比一浪高的走勢。
內地直撲4600點
過去幾年美國股市升咗咁耐，已經變成老牛，其他歐洲、日本股市喺量寬下去年大升咗一陣，算做中年牛，相比下內地隻牛仲算年輕。家有人用實體經濟同企業盈利增長表現判斷，認為內地股市升勢不合理，但若果用呢個標準，歐洲仲差，但歐洲股市創晒新高，所以如果夾硬要搵個理由解釋，只能話太多資金湧入股市啦！唔理你覺得中港股市升得合唔合理，總之家個市日日成交好大，反映好多人參加呢個遊戲。
家唯有政府行為對股市有影響，內地上證綜指昨日一度高見4572點，直撲4600點大關，本周放出新一輪新股上市，該批25隻新股凍結資金介乎2.3萬億元至2.7萬億元人民幣，似乎都阻唔住個市升勢。
阿爺焗住出口術降溫，中國證監會網站喺午市時貼文，表示留意到新投資者激增，全民炒股的風險，提醒不少新投資者只看到炒股賺錢的可能性，忽視賠錢的風險，對股市漲跌缺乏感受。該會提醒廣大投資者，特別是新仔要做足功課、理性投資、尊重市場、敬畏風險，牢記股市有風險，量力而為，不要盲目跟風炒作。
官方機構提示風險，市場即刻不敢太勇，下午回得深啲，內地上證指數跌逾1.1%，收報4476點。香港個市大方向同內地一樣，變成回氣待變，但港股在期指結算前夕唔肯跟內地跌咁多，國指只是微跌0.2%，恒指仲要微升9點。資金流向特別概念股份，昨日中航工業(232)就相當搶眼，除了交投活躍，成交大增，收報1.17元，升20%。聯交所資料顯示，長和(001)持有中航工業約8.15%，由於長和主席李嘉誠曾增持該系股份，包括中航科工(2357)等類似概念股份早前飆升過一輪。
出品增加 軍工看俏
航天系營運不少生意，但概念係軍工發展，中國軍費不斷增加，本國需求已大，習大大推動走出國門的策略，武器出口亦增，中航科工屬下的飛機業務都會加強推動外銷產品力度，有咁概念，所以炒味特濃，家升得急，唔排除佢會調整，但走短線就會幾刺激。
內銀股大致造好力撐大市，高盛唱好中信股份(267)受惠旗下資產升值，中信股份跑贏一眾藍籌，全日收15.72元，漲5.8%；龍源(916)首季多賺43%，全日造10.18元，升2.5%，升幅是國企指數最勁。收市後，國壽(2628)公佈首季業績，盈利升70%，反映股市向好對金融機構的影響。
中石油(857)與中石化(386)技術性否認合併傳聞，加上中石油首季純利大跌82%，股價急吐5%，造10.14元。
中石化總經理王天普落馬，因涉嫌嚴重違紀違法，股價插4.9%，齊齊成為最曳藍籌及國企成份股，呢啲重組概念股升得急回得快，應咗我講短炒要快的格言。
沒有留言:
張貼留言