?家全球股市焦點都落喺通縮之上。早兩日，陸羽仁喺騰訊網睇到張相(見圖)，係法國農民組織抗議肉價下跌，係超市擺放個豬欄。見到呢個場面，好多人或者覺得幾誇幾搞笑。陸羽仁乜都諗起有乜投資啟示，法國農民不滿豬肉下跌，顯示副食品供過於求，係典型穀賤傷農的格局，其實唔止係豬肉，奶農一樣有咁情況。呢種情況唔止喺經濟發展成熟的歐洲出現，在中國都發生緊，內地奶農因為奶價大跌賣不出，要不斷倒奶。
歐洲以至環球通縮，影響之一係搞到阿爺出口好差，用逆向思維諗，咁反而唔使太驚個市，因為阿爺焗住放水。當個市跌到咁上下，中央就會出手，咁樣個市又唔會壞得去邊。
通縮焗阿爺放水
呢種維穩思維，?家已經變成官員的主導思想。《新華網》引述財政部副部長朱光耀出席國際經濟研討會時話，國際貨幣基金組織(IMF)日前將2015年世界經濟增長預期從去年10月預測的3.8%下調到3.5%，這表明世界經濟面臨嚴峻挑戰，二十國集團(G20)成員應加強協調，共同推動世界經濟穩定復甦。
朱光耀仲指出，中國經濟已進入新常態，呈現三個主要特點包括：經濟將從高速增長轉向中高速增長；經濟結構不斷改善升級；以及從要素驅動轉向創新驅動。
可以咁睇，在新常態下，內地唔再係高增長國家，尤其唔會爭取粗放式增長，股市喺呢種情況下，會出現升升停停，以及個別發展的情況，投資者買股唔需要太進取，但當個市跌得多時，又唔使太悲觀同擔心。
受中國出入口數據差影響，恒指低開150點後早段跌勢加劇，最多跌幅一度擴大至230點，好彩內地股市回升，令港股跌幅收窄，恒生指數收報24521點，跌158點；國企指數收報11647點，跌49點，成交縮減至672億元。中移動(941)與騰訊(700)為跌市火車頭，合共質低恒指64點。
藍籌股匯控(005)又中招，有報道指該行承認瑞士分行助客戶瞞稅，全日微跌0.05元，報72.8元；旺旺(151)發盈警，股價遭拋售，為表現最曳藍籌，收報8.57元，挫0.3元，跌3.3%。
佳兆業(1638)獲融創(1918)打救，融創復牌收報7.19元，揚0.25元，升3.6%；午後復牌的佳兆業，全日急升0.28元或17.6%。
股仔抽水玩殘小股東
唔少股仔出招抽水。蒙古礦業(1166)建議股本重組，之後將以一比五比例供股，股價應聲急瀉，為表現最差港股，收報0.038元，狂瀉42%；康宏金融(1019)建議一供三方式，供股作價0.25元，比上日收市價大幅折讓71.3%，全日大跌20%，收0.7元。
另外，有媒體引述消息指出，小米擬加快籌組上市步伐，內部暫已決定以美國作上市首選地。彭博就引述小米發言人Joy Han表示，該公司目前沒有IPO計劃。今年美國投資銀行要食大茶飯，目標之一係雷軍的小米，所以投行的聰明腦袋圍住佢團團亂轉，不斷提交方案，但聽發言人反應，似乎暫時仲未有打動到他的人。早排隻金山軟件(3888)炒小米上市有好料益佢，而金山軟件跟大市回頭，可能要等耐啲，等到小米上市才有炒作。
沒有留言:
張貼留言