悶局之中，最近匯豐中國公佈製造業PMI創三個月高位，本來呢個係好消息，但撞正上日美股連升多日後調整，內地股市回吐，港股又無運行，全日回吐70點，恒生指數收報23333點，國企指數收報10438點，升11點，成交僅多於五百億元。
大股乏善足陳，中移動(941)早前宣佈最近一季純利繼續倒退，昨日公佈季度業績的聯通(762)，放榜前沽壓重，全日收造10.92元，挫3.5%，收市後公佈首三季多賺26%；至於中移動沽壓持續，全日跌3.2%，報88.1元，聯通與中移動是藍籌首兩位表現最曳股份。
輪到炒鐵路股
發改委昨日批出8個新基建投資項目，總投資額達1500億元人民幣，受消息沖喜，基建股普遍向上。中鐵(390)是升幅最大國指成份股，全日漲2.3%，造4.37元；中交建(1800)、中鐵建(1186)都逆市造好。除咗鐵路基建股，高鐵設備股南車(1766)、北車(6199)都飆高，不過，由於呢個板塊累積升幅有番咁上下，短期要留意可能有回吐。
近排市場興炒股仔，但高回報總係有高風險，尤其股仔行事未必按牌理出牌，好容易變成散戶陷阱。
中策集團(235)失驚無神就公佈，擬按2供1基準供股，籌集約1.78億元，每股供股股份認購價為0.08元，較之前收市價0.199元，大幅折讓近60%。公司話，準備將所得款項中40%至50%用於發展放債業務，約30%至40%用於發展金屬及電子產品貿易，仲話正成立新部門專注個人貸款市場。
受供股消息打擊，股價一度急插兩成，收市好番啲，報0.175元，跌咗12%，呢啲就係炒股仔的風險。
睇番資料，中策呢兩年股價無乜點大波動，大多數時間喺0.1至0.2元間波動，雖然今年曾經試過急炒上0.3元，但為時相當短暫，喺咁嘅情況下宣佈供股，確係有啲出人意表。中策主席係前恒生銀行高層柯清輝，佢退休後不經不覺加入股壇已有多年，中策喺佢管理下，主要業務相當簡單，主要係做吓投資放債同電子產品業務。上半年公司宣佈轉虧為盈，但無派中期息，今次集資大部份資金係用來做放債業務。
中策股東要焗跟
本來，中策股價同淨值差唔多，若然公司賣盤，小股東就可以收到殼價，但家管理層決定供股，而且仲係大幅折讓，睇嚟小股東無癮之餘，有銀者唯有二仔底焗住繼續跟落去。
中策抽水搞大財務生意，同樣做放貸生意的靄華押業(1319)中期純利按年升143.8%，主席兼行政總裁陳啟豪表示，中期整體淨息差由26.2%收窄至22.8%，主要因按揭業務比重日漸增加，按揭的淨息差較典當業務為低，期內兩者淨息差分別為16.1%及43.8%，預期情況會持續，未來淨息差會繼續收窄。雖然息差無咁好賺，但因為按揭市場大，陳啟豪表示未來繼續專注典當及按揭業務，有信心未來可以維持高增長，認為公司仍有很大發展空間。
沒有留言:
張貼留言