由於美股連續回升，港股變成大落後，昨日終於見到買盤追吓貨，大市高開212點，雖然一度升幅收窄，午後最多上升372點，恒生指數收報23403點，飆315點；國企指數收報10426點，上升150點，成交金額增加至615億元，大市由成交萎縮跌到低點，跟住炒番上一浸，係幾典型的跌後反彈。
不過，內地消息仲係時好時淡，美股又已連升四日，唔知仲有幾多可以升。若然外圍繼續好，唔排除港股會彈多陣，如果外圍個市回頭，咁就要小心再反彈唔到幾多。
油價跌 中石油頭痕
港股彈升係借外圍嘅力，美國科技公司業績理想，所以益到在港上市嘅科技股。好耐無威嘅騰訊(700)飆升3.4%，造119.3元，為恒指升幅最大功臣，向大市進貢67點，跑贏一眾藍籌股。金山軟件(3888)、中國軟件國際(354)、IGG(8002)都升超過4%。最誇嘅係中信21世紀(241)後日改名為阿里健康信息技術，全日爆升28.6%，升幅為港股最勁。
炒開外圍數據，波羅的海乾貨船綜合指數昨晚急升12%，創逾五年來最大的單日升幅，令一眾航運股受追捧。中海發展(1138)、中國遠洋(1919)都升咗6%。全球增長都有放緩陰影，加上通縮威脅消費需求，其實航運業係咪咁樂觀，大戶心知肚明，不過一來炒股有時唔係講理性，航運股咁耐無郁，炒吓就當燒冷灶。
再者，油價跌咗咁多，對航運公司營運成本有一定幫助，既然佢哋股價都仲係低殘，悶悶哋就炒番轉，但呢類傳統舊經濟股，睇唔到有好大潛力可以長炒，所以炒得兩日好可能又係鬥快散水格。
講開油價跌，受國際油價近期不斷大幅下滑影響，有中石油(857)高層接受《21世紀經濟報道》訪問時表示，公司擁有大量石油商業儲備，在油價受壓下，需要作大幅撥備減值準備，未來利潤增長預測也因此調低。
高層未有透露減值準備的金額，只是表示，在油價下滑的趨勢下，公司會盡可能降低一些高成本上游業務，以觀望未來油價走勢。
不過，呢個消息好可能係公司有意放出氣球，等市場消化負面消息，既然講得出口，相信撥備數目會有番咁上下。喺低油價環境下，相信中海油(883)都一樣頭痕。
酒店地爆小冷門
政府全力推地，無論住宅同商住地都一樣，上個星期推出的東涌酒店地話咁快就開標，結果有小小冷門，由內房商世茂房地產(813)及明發(846)合組而成的公司投得，平均呎價2983元，符合市場預期。
呢個項目收到六份標書，發展商包括信置(083)、世茂房地產及明發、帝盛酒店(2266)、富豪國際(078)、德祥地產(199)及一間不知名財團入標，咁多個財團唔少係專做開酒店，結果由做開內房嘅世茂財團投得，估計其他公司都唔係咁勇。
本來，市場一直話對酒店需求殷切，今次大財團無落力出價，唔知同佔中有無關。不過，更大可能係政府咁多地推出，財團或者都想保留實力揀啲最優質項目，又或者競投流轉較快的住宅項目，好過慢慢起酒店收租啦。
沒有留言:
張貼留言