香港人一向醒目，個市有錢賺，大家聞到味，都想「趣趣哋」買多少係人之常情，不過個市咁爆升，波動自然大，陸羽仁都驚今日介紹完佢仲升緊，明日佢就跌，咁又點樣搵番佢呢班臨時茶友講番呢？所以我通常都會叫佢睇專欄，最多就係上埋網睇我嘅日誌，因為我知無不言，最好嘅嘢都同讀者分享咗。
資金市唔使攞冧巴
有人講笑，話?家個市唔係諗買乜「冧巴」，而係諗敢唔敢入市，因為你敢入市，拎張行情貼喺牆上，掟枝飛鏢埋去，準繩度絕對唔差得過專家，所以要飛鏢得啦仲使乜要冧巴！呢個講法有一定道理，因為?家係資金市，正式係大水沖倒龍王廟，盲拳可以打死老師傅。
我可以補充嘅係，?家個市係不斷炒，炒完優質股炒落後，炒完落後又炒其他落後，如果有買開股票，就可以咁捉路走多兩轉。若然唔係短炒開，手頭有啲股，高位食吓胡，但就唔使心急，一於慢慢買，反正依家手頭有貨，賺到開巷，咁咪整定止賺位坐吓囉。同樣，如果係有長年蟹貨，咁咪等得七年，不妨睇多七日囉，總之就訂好止賺位保護自己。
個市昨日升，一個理由係內地再開放市民開戶，呢樣嘢表面睇唔特別，真正意義係話畀大家聽，阿爺到昨日為止仲未覺得要控制個市，結果中港兩地股市就爆升，好消息出個不停，好似資金湧入未停，港匯續貼緊強方7.75水平，又有投行摩根士丹利護航，上調恒生指數未來12個月目標至三萬點，上證指數高收2.2%升破4100點。
內地升，港股都跟得足，連升第八個交易日，全日飆743點，更上破兩萬八，創逾七年新高。恒生指數昨收造28016點，八個交易日累漲3530點。國企指數收報14590，升602點，成交金額2636.4億元。
藍籌股大致造好。最矚目係港交所(388)，股價創歷史新高，最高見過300元，全日收造297.4元，狂升48.4元，其他本地證券股亦急升。喺咁環境下，保守嘅領匯(823)成為包尾藍籌，收造47.8元，跌1.9元。
內地收緊「一簽多行」政策，即日起改為「一周一行」，本地零售股同濠賭股應聲下挫。持有495萬股港交所的周生生(116)未受收緊自由行影響，股價隨大市向上。我講過話呢排興炒落後，旺市有智慧不如趁勢，不要逆市而行，既然零售、濠賭以至商場類股份受政策影響嘅股份，就暫時唔係咁值得考慮。
跟紅頂白唔好逆勢炒
國家電網新疆電力公司昨日公佈，「十三•五」期間計劃投資2019億元人民幣，用於疆電外送通道與新疆區內電網骨架建設，呢排見到新疆為名嘅股份開始炒炒吓。
招行(3968)通過60億元人民幣員工持股計劃，股份復牌後搶高，全日收造24.6元，爆升25%，跑贏一眾國企指數成份股，其他內銀股亦全線升，以一隻大股嚟講，咁升法真係幾驚人，反映人心向好，市場對好消息反應特別強烈，一有風吹草動，大家就湧入去尋寶。喺呢啲日子，太理性有時反應會慢咗，但唔理性將來又會後悔，所以有茶友話依家要「理性地唔理性」，即係明知自己玩緊係癲鳳鬥狂龍，係投機的我落緊場玩，炒得嚟千祈唔好信咗自己係投緊資。
沒有留言:
張貼留言